വിഎസിനെ തള്ളി;സിപി തന്നെ പൊളിറ്റിക്കല്‍ സെക്രട്ടറി

തിരുവനന്തപുരം: മുഖ്യമന്ത്രി വിഎസ് അച്യുതാനന്ദന്റെ കടുത്ത എതിര്‍പ്പിനെ തള്ളിക്കൊണ്ട് അദ്ദേഹത്തിന്റെ പൊളിറ്റിക്കല്‍ സെക്രട്ടറിയായി സിപി നാരായണനെ നിയമിയ്ക്കാന്‍ സിപിഎം സംസ്ഥാന സമിതി യോഗം തീരുമാനിച്ചു. ബുധനാഴ്ച ചേര്‍ന്ന സംസ്ഥാന സെക്രട്ടറിയേറ്റിന്റെ തീരുമാനം സംസ്ഥാന സമിതി അംഗീകരിയ്ക്കുകയായിരുന്നു.

സിപി നാരായണനെ സെക്രട്ടറിയാക്കണമെന്ന പാര്‍ട്ടി നിര്‍ദ്ദേശം നേരത്തേ വിഎസ് തള്ളിയിരുന്നു. മുഖ്യമന്ത്രിയ്ക്ക് താല്‍പ്പര്യമില്ലാത്തതിനാല്‍ നാരായണന് പകരം മറ്റൊരു പേര് പാര്‍ട്ടി നിര്‍ദ്ദേശിയ്ക്കുമെന്നായിരുന്നു സൂചന.

എന്നാല്‍ പാര്‍ട്ടി തീരുമാനം മുഖ്യമന്ത്രി അംഗീകരിയ്ക്കാന്‍ ബാധ്യസ്ഥനാണെന്ന് ഔദ്യോഗിക പക്ഷം സംസ്ഥാന സെക്രട്ടറിയേറ്റിലും സമിതിയിലും ഉറച്ച നിലപാടെടുത്തു. ഔദ്യോഗികനേതൃത്വം മുന്‍തീരുമാനത്തില്‍ ഉറച്ചുനിന്നതോടെ കേന്ദ്രനേതൃത്വവും അത് അംഗീകരിച്ചു.

വിഎസിനെതിരെയുള്ള നീക്കം അവിടെയും അവസാനിച്ചില്ല. കിനാലൂര്‍ പ്രശ്‌നത്തില്‍ അദ്ദേഹം നടത്തിയ ഇടപെടലുകള്‍ക്കെതിരെ ഔദ്യോഗികപക്ഷം കടുത്ത വിമര്‍ശനമാണ് അഴിച്ചുവിട്ടത്.

വ്യവസായമന്ത്രി എളമരം കരീമിനു മീതെ കൂടി മുഖ്യമന്ത്രി നടത്തിയ നീക്കങ്ങള്‍ അവിടെ ആശയക്കുഴപ്പം സൃഷ്ടിച്ചുവെന്നായിരുന്നു വിമര്‍ശനം. സംഭവത്തില്‍ ഇടപെട്ട മുഖ്യമന്ത്രി പ്രശ്‌നം വഷളാക്കി. വിഎസിന്റെ നടപടികള്‍ കിനാലൂരില്‍ സര്‍ക്കാര്‍ എന്തോ തെറ്റ് ചെയ്‌തെന്ന ധാരണയാണ് ജനങ്ങളില്‍ പരത്തിയത്. തീവ്രവാദശക്തികള്‍ക്ക് പിന്തുണയേകുന്ന നീക്കം അംഗീകരിയ്ക്കാന്‍ കഴിയില്ല. പൊലീസിന്റെ ആത്മവീര്യം കെടുത്ത നടപടികളെന്ന ആരോപണവും വിഎസിനെതിരെ ഉയര്‍ന്നു.

ജനങ്ങളെ ബോധ്യപ്പെടുത്തി കിനാലൂര്‍ പദ്ധതിയുമായി മുന്നോട്ടുനീങ്ങാന്‍ സംസ്ഥാനകമ്മിറ്റി സര്‍ക്കാരിനോടാവശ്യപ്പെട്ടു.