കെഎസ് മനോജിന് കോണ്‍ഗ്രസില്‍ ചേരാന്‍ ആഗ്രഹം

ദില്ലി: സിപിഎം വിട്ട മുന്‍ ആലപ്പുഴ എംപി ഡോക്ടര്‍ കെഎസ് മനോജ് കോണ്‍ഗ്രസിലേക്ക്. കെപിസിസി പ്രസിഡന്റ് രമേശ് ചെന്നിത്തല, പ്രതിപക്ഷ നേതാവ് ഉമ്മന്‍ ചാണ്ടി എന്നിവരെ നേരില്‍ക്കണ്ടാണ് കെഎസ് മനോഡ് കോണ്‍ഗ്രസില്‍ ചേരാനുള്ള ആഗ്രഹം അറിയിച്ചത്. ദില്ലിയില്‍ വെച്ചായിരുന്നു കൂടിക്കാഴ്ച.

മുതിര്‍ന്ന നേതാക്കളായ എ.കെ. ആന്റണി, വയലാര്‍ രവി എന്നിവരുമായി കൂടിയാലോചിച്ച് മനോജിന്റെ കോണ്‍ഗ്രസ് പ്രവേശന കാര്യത്തില്‍ തീരുമാനമെടുക്കുമെന്ന് ഉമ്മന്‍ ചാണ്ടി പറഞ്ഞു.

പഞ്ചായത്ത് തിരഞ്ഞെടുപ്പില്‍ കോണ്‍ഗ്രസിനുവേണ്ടി പ്രവര്‍ത്തിക്കുമെന്നും സോണിയാ ഗാന്ധി നേതൃത്വം നല്‍കുന്ന കോണ്‍ഗ്രസിനു മാത്രമേ രാജ്യത്തെ രക്ഷിക്കാനാകൂ എന്നും ഡോക്ടര്‍ മനോജ് പിന്നീടു പറഞ്ഞു. മതവിശ്വാസത്തെക്കുറിച്ചുള്ള പാര്‍ട്ടി നിലപാടില്‍ ആശയക്കുഴപ്പമുണ്ടെന്ന് പറഞ്ഞാണ് സിപിഎം വിട്ടത്.

സിപിഎമ്മിന്റെ ലോക്‌സഭാംഗമായിരുന്ന എപി അബ്ദുള്ളക്കുട്ടിക്കു പിന്നാലെയാണ് മനോജ് കോണ്‍ഗ്രസില്‍ കയറിക്കൂടാന്‍ ശ്രമിയ്ക്കുന്നത്. അബ്ദുള്ളക്കുട്ടി ഇപ്പോള്‍ കോണ്‍ഗ്രസിന്റെ എംഎല്‍എയുമാണ്. സിപിഎം വിട്ടുവരുന്നവരെ കോണ്‍ഗ്രസ് അംഗത്വം നല്‍കി തിരഞ്ഞെടുപ്പുകളില്‍ മത്സരിപ്പിക്കുന്നതിനോട് കടുത്ത എതിര്‍പ്പാണ് പാര്‍ട്ടിയ്ക്കുള്ളില്‍ ഉയരുന്നത്.