സോണിയയെ അയോഗ്യയാക്കേണ്ടതില്ല: സുപ്രീം കോടതി

ദില്ലി: കോണ്‍ഗ്രസ് അധ്യക്ഷ സോണിയ ഗാന്ധിയുടെ ലോക്‌സഭാഗത്വം റദ്ദാക്കണമെന്നാവശ്യപ്പെട്ട് സമര്‍പ്പിയ്ക്കപ്പെട്ട ഹര്‍ജി സുപ്രീം കോടതി തള്ളി. മലയാളി മാധ്യമപ്രവര്‍ത്തകനായ പി രാജന്‍ സമര്‍പ്പിച്ച ഹര്‍ജിയാണ് ചീഫ് ജസ്റ്റിസ് എസ്.എച്ച് കപാഡിയ അധ്യക്ഷനായ ബഞ്ച് തള്ളിയത്.

സോണിയ ഗാന്ധി ബല്‍ജിയം സര്‍ക്കാരിന്റെ ഔദ്യോഗിക ബഹുമതി സ്വീകരിച്ചെന്നും ഇത് ഭരണഘടനാ ലംഘനമാണെന്നും ഹര്‍ജിയില്‍ ആരോപിച്ചിരുന്നു. മുന്‍ എംപി. സെബാസ്റ്റ്യന്‍ പോളാണ് കോടതിയില്‍ രാജന് വേണ്ടി ഹാജരായത്.

ഔദ്യോഗിക ബഹുമതിയല്ല ഉപഹാരം മാത്രമാണ് സോണിയയ്ക്ക് നല്‍കിയതെന്ന് ബല്‍ജിയം സര്‍ക്കാര്‍ വ്യക്തമാക്കിയിട്ടുണ്ടെന്ന് കേന്ദ്രസര്‍ക്കാര്‍ കോടതിയെ അറിയിച്ചു. ഇതിന്റെ അടിസ്ഥാനത്തിലാണ് ആവശ്യം അംഗീകരിയ്ക്കാനാവില്ലെന്ന് കോടതി വിധിച്ചത്.