സ്ത്രീധന പീഡനം: കന്നഡ നടന്‍ അറസ്റ്റില്‍

ബാംഗ്ലൂര്‍: സ്ത്രീധനം കൂടുതല്‍ വേണമെന്നാവശ്യപ്പെട്ട് ഭാര്യയെ പീഡിപ്പിച്ച കേസില്‍ യുവ കനഡതാരം ആനന്ദിനെ ബാംഗ്ലൂര്‍ പോലീസ് അറസ്റ്റുചെയ്തു. ആനന്ദിന്റെ ഭാര്യ ഭരണി ത്യാഗരായ നഗര്‍ വനിതാ പോലീസ് സ്‌റ്റേഷനില്‍ നല്‍കിയ പരാതിയിന്മേലാണ് അറസ്റ്റ്.

പുതിയ ചിത്രത്തില്‍ തന്റെ നായികയായി അഭിനയിക്കുന്ന നടി രമ്യാ ബര്‍ണയുമായി ആനന്ദ് അടുപ്പത്തിലാണെന്നു പരാതിയില്‍ ആരോപിക്കുന്നുണ്ട്. ആനന്ദിന്റെ അച്ഛന്‍ ബദരയ്യ, നടി രമ്യബര്‍ണ എന്നിവരെയും പരാതിയില്‍ ഉള്‍പ്പെടുത്തിയിട്ടുണ്ട്.

ആനന്ദിന്റെ രണ്ടാമത്തെ ചിത്രമായ 'നന്നദയ ഹാപു' വിന്റെ നിര്‍മാണം സാമ്പത്തിക പ്രശ്‌നത്തെ തുടര്‍ന്ന് നിലച്ചപ്പോള്‍ തന്റെ അന്‍പതുലക്ഷം രൂപയുടെ ആഭരണങ്ങള്‍ വിറ്റുവെന്ന് ഭരണിയുടെ പരാതിയില്‍ പറയുന്നു.

ഭര്‍ത്താവിന്റെ സിനിമയുടെ ചിത്രീകരണം പൂര്‍ത്തിയാക്കാനും അദ്ദേഹത്തിന് കന്നഡ സിനിമയില്‍ ഉയര്‍ച്ചയുണ്ടാവാനും ആഗ്രഹിച്ചാണ് ആഭരണം വില്‍ക്കാനായി കൊടുത്തത്. എന്നാല്‍ അതിനുശേഷവും കൂടുതല്‍ പണം മാതാപിതാക്കളില്‍ നിന്നു വാങ്ങിക്കൊണ്ടുവരാന്‍ ആനന്ദ് നിര്‍ബന്ധിക്കുകയാണ്. ഈ ആവശ്യമുന്നയിച്ച് തന്നെ നിരന്തരം മര്‍ദിക്കുകയും മാനസിക പീഡനമേല്‍പ്പിക്കുകയും ചെയ്യുകയാണ്-ഇങ്ങനെപോകുന്നു പരാതി.

ആനന്ദ് ചിത്രത്തിലെ നായികയായ രമ്യാബര്‍ണയുമായി അടുപ്പത്തിലായതും തന്നെ പീഡിപ്പിക്കാന്‍ കാരണമാണെന്നും ഭരണി പറയുന്നു. ഒരുവര്‍ഷം മുന്‍പായിരുന്നു ഭരണിയുമായുള്ള ആനന്ദിന്റെ വിവാഹം.

പോലീസ്‌കേസ് രജിസ്ട്രര്‍ ചെയ്തിട്ടുണ്ട്. ഉദയാ ടിവിയിലെ അവതരാകനായിരുന്നു ആനന്ദ് 'മനസുഗാല മാതു മധുര' എന്ന ചിത്രത്തിലൂടെയാണ് വെള്ളിത്തിരയിലേക്കു വന്നത്.