കിനാലൂര്‍: സര്‍വ്വകക്ഷിയോഗം 29ന്

കോഴിക്കോട്: കിനാലൂര്‍ സമരസമിതി നേതാക്കളുമായി മുഖ്യമന്ത്രി വി.എസ് അച്യുതാനന്ദന്‍ കൂടിക്കാഴ്ച നടത്തി. ജനങ്ങളെ ബുദ്ധിമുട്ടിലാക്കുന്ന തരത്തില്‍ നടപടികള്‍ ഉണ്ടാകില്ലെന്ന് മുഖ്യമന്ത്രി ഉറപ്പു നല്‍കിയതായി നേതാക്കള്‍ പറഞ്ഞു.

ഇതിനിടെ മെയ് 29ന് നാലുമണിയ്ക്ക് തിരുവനന്തപുരത്താണ് സര്‍വ്വകക്ഷിയോഗം ചേരുകയെന്നും വിഎസ് അറിയിച്ചിട്ടുണ്ട്. സര്‍വകക്ഷി യോഗത്തില്‍ എല്ലാവരെയും ക്ഷണിക്കുമെന്ന് മുഖ്യമന്ത്രി പിന്നീടു മാധ്യമപ്രവര്‍ത്തകരോട് സംസാരിക്കുന്നതിനിടെ വ്യക്തമാക്കി.

സര്‍വ്വകക്ഷി യോഗത്തിലേക്ക് ജില്ലയിലെ വിവിധ കക്ഷിനേതാക്കളെ മാത്രം ക്ഷണിച്ചാല്‍ മതിയെന്ന പാര്‍ട്ടി നിലപാടിന് വിരുദ്ധമായാണ് മുഖ്യമന്ത്രിയുടെ ഈ തീരുമാനം. നാലുവരിപ്പാത സംബന്ധിച്ച് ആളുകളുടെ വിഷമങ്ങള്‍ സമരസമിതി നേതാക്കള്‍ മുഖ്യമന്ത്രിയുമായി പങ്കുവച്ചു.

കിനാലൂര്‍ വിഷയം ചര്‍ച്ച ചെയ്യാനുള്ള സര്‍വകക്ഷി യോഗത്തിലേയ്ക്ക് സമര സമിതി പ്രതിനിധികളെ ക്ഷണിക്കുന്നത് സംബന്ധിച്ച് അനുകൂലമായ തീരുമാനം എടുക്കുമെന്ന് മുഖ്യമന്ത്രി പറഞ്ഞതായി നേതാക്കള്‍ അറിയിച്ചു.

സര്‍വകക്ഷി യോഗത്തിലേക്കു തങ്ങളെ ക്ഷണിക്കണമെന്ന് ആവശ്യപ്പെട്ട് സമര സമിതി മുഖ്യമന്ത്രിക്കു നിവേദനം നല്‍കിയിട്ടുണ്ട്. നാലുവരിപ്പാത ഉപേക്ഷിക്കണമെന്നും നിവേദനത്തില്‍ ആവശ്യപ്പെട്ടിട്ടുണ്ട്.

മുഖ്യമന്ത്രിയുടെ ഭാഗത്തു നിന്നു നീതി കിട്ടുമെന്ന് നേതാക്കള്‍ പ്രതീക്ഷ പ്രകടിപ്പിച്ചു. വി.എസിനോട് സമരസമിതി കിനാലൂര്‍ സന്ദര്‍ശിക്കണമെന്ന് ആവശ്യപ്പെട്ടിട്ടുണ്ട്. ജനജാഗ്രത പ്രവര്‍ത്തകരും ജനകീയ ഐക്യവേദിയും ചര്‍ച്ചയില്‍ പങ്കെടുത്തു.