കേരള കോണ്‍ഗ്രസ്: അവകാശവാദവുമായി പിസി തോമസ്

ദില്ലി: യഥാര്‍ത്ഥ കേരള കോണ്‍ഗ്രസ് തങ്ങളെന്ന് പി സി തോമസ് വിഭാഗം അവകാശമുന്നയിച്ചു. ഇക്കാര്യം കാണിച്ച് പി സി തോമസ് കേന്ദ്ര തെരഞ്ഞെടുപ്പു കമ്മീഷന് കത്ത് അയച്ചിരിക്കുകയാണ്.

തങ്ങളുടെ പാര്‍ട്ടിയുടെ ചിഹ്നവും പേരും മറ്റാര്‍ക്കും നല്കരുത് എന്നാണ് കത്തിലെ പ്രധാന ആവശ്യം.കേരള കോണ്‍ഗ്രസില്‍ ഉണ്ടായത് പിളര്‍പ്പ് അല്ലെന്നും ചിലര്‍ പാര്‍ട്ടി വിട്ടു പോകുകയാണ് ഉണ്ടായതെന്നും കത്തില്‍ പറയുന്നു.

പാര്‍ട്ടി വിട്ടു പോയ പിജെ ജോസഫിന് ചിഹ്നവും പേരും അവകാശപ്പെടാന്‍ അധികാരമില്ല.പി ജെ ജോസഫ് പാര്‍ട്ടി വിട്ടു പോയപ്പോള്‍ പാര്‍ട്ടി തന്നെ ചെയര്‍മാനായി തെരഞ്ഞെടുക്കുക ആയിരുന്നു എന്നും പി സി തോമസ് കത്തില്‍ പറയുന്നുണ്ട്.

കേരള കോണ്‍ഗ്രസില്‍ നിന്ന് കുറച്ച് ആളുകള്‍ മാത്രം അച്ചടക്കലംഘനം നടത്തി പുറത്തുപോവുകയാണുണ്ടായതെന്നും കത്തില്‍ പറയുന്നു.

അതേസമയം, ഇപ്പോഴത്തെ സാഹചര്യത്തില്‍ പി സി തോമസിന് എതിരെ എന്തെങ്കിലും തരത്തിലുള്ള രേഖകളുമായി പി ജെ ജോസഫ് മുന്നോട്ടു വരികയാണെങ്കില്‍ ഇതു സംബന്ധിച്ചുള്ള തീരുമാനം രണ്ടുപക്ഷത്തിന്റെയും അഭിപ്രായം കേട്ടിട്ട് കൈക്കൊള്ളുമെന്ന് തിരഞ്ഞെടുപ്പ് കമ്മീഷന്‍ വൃത്തങ്ങള്‍ അറിയിച്ചു.

ജോസഫ് വിഭാഗം മുന്നോട്ടു വന്നില്ലെങ്കില്‍ പേരും ചിഹ്നവും തോമസ് വിഭാഗത്തിന് ലഭിക്കുമെന്നും കമ്മീഷന്‍ അറിയിച്ചു. വി സുരേന്ദ്രന്‍ പിള്ള എം എല്‍ എയ്ക്ക് എം എല്‍ എ സ്ഥാനം നഷ്ടമാകില്ല എന്നും കമ്മീഷന്‍ അറിയിച്ചിട്ടുണ്ട്.