ആശുപത്രിയില്‍ വിജയകുമാറിന്റെ 'അഭിനയം'

ആലുവ: വിസ തട്ടിപ്പുകേസില്‍ കോടതി റിമാന്റ് ചെയ്ത നടന്‍ വിജയകുമാര്‍ ആശുപത്രിയില്‍ ചലച്ചിത്രസമാനമായ രംഗങ്ങള്‍ സൃഷ്ടിച്ചു. ജയിലില്‍ കുഴഞ്ഞുവീണതിനെത്തുടര്‍ന്ന്ാണ്് വിജയകുമാറിനെ ആലുവ താലൂക്ക് ആശുപത്രിയില്‍ പ്രവേശിപ്പിച്ചത്.

ശനിയാഴ്ചയായിരുന്നു ഇയാളെ കോടതി റിമാന്റ് ചെയ്തത്. അന്ന് വൈകുന്നേരത്തോടെ കുഴഞ്ഞുവീണതിനെത്തുടര്‍ന്ന് ആശുപത്രിയില്‍ പ്രവേശിപ്പിച്ചു. ഇവിടെ നിന്ന് പിന്നീട് കളമശ്ശേരി സഹകരണ മെഡിക്കല്‍ കോളേജിലും എത്തിച്ചു.

ഞായറാഴ്ച മുഴുവന്‍ കളമശ്ശേരി സഹകരണ മെഡിക്കല്‍ കോളേജില്‍ കഴിഞ്ഞ വിജയകുമാറിന് കുഴപ്പമൊന്നുമിവ്വെന്നും ആശുപത്രിയില്‍ തുടരാനാകില്ലെന്നും അധികൃതര്‍ അറിയിച്ചതോടെ തിരിച്ച് ആലുവ താലൂക്ക് ആശുപത്രിയില്‍ പ്രവേശിപ്പിക്കുകയായിരുന്നു.

ഇവിടെയെത്തിയ ഉടനെ തൃശ്ശൂര്‍ മെഡിക്കല്‍ കോളേജിലേക്ക് മാറ്റണമെന്ന് വിജയകുമാര്‍ ആവശ്യപ്പെട്ടുവത്രേ. ഇതിനിടെ പോലീസ് വിജയകുമാറിനെ ആശുപത്രിയില്‍ നിന്ന് ഡിസ്ച്ചാര്‍ജ് ചെയ്യാന്‍ ശ്രമം നടത്തിയെങ്കിലും സാധിച്ചില്ല.

ഡോക്ടര്‍മാര്‍ എത്തുമ്പോഴൊക്കെ വിജയകുമാര്‍ അവശനായി തളര്‍ന്നു വീഴുന്നുണ്ടായിരുന്നു. ഛര്‍ദ്ദിക്കുകയും ചെയ്തു. നടന്‍ ആശുപത്രിയിലെത്തിയ വിവരമറിഞ്ഞ് പടമെടുക്കാനായി എത്തിയ മാധ്യമ പ്രവര്‍ത്തകരെ വിജയകുമാറും കൂടെയുണ്ടായിരുന്നവരും വിരട്ടിയോടിക്കാന്‍ ശ്രമിച്ചു.. ഇവരെ പുറത്താക്കണമെന്നാവശ്യപ്പെട്ട് നടന്‍ പോലീസിനോടും കയര്‍ത്തു.

രണ്ട് മണിക്കൂറോളം ആശുപത്രിയില്‍ നാടകീയരംഗങ്ങള്‍ സൃഷ്ടിച്ചശേഷം വിദഗ്ദ്ധ ചികിത്സയ്ക്ക് എന്ന പേരില്‍ വിജയകുമാറിനെ തൃശ്ശൂര്‍ മെഡിക്കല്‍ കോളേജിലേക്ക് റഫര്‍ ചെയ്യുകയായിരുന്നു. താലൂക്ക് ആശുപത്രിയില്‍ കാര്‍ഡിയോളജിസ്റ്റ് ഇല്ലെന്ന കാരണം പറഞ്ഞാണത്രേ തൃശൂരിലേയ്ക്ക് കൊണ്ടുപോയത്.