ഗൂര്‍ഖ ലീഗ് നേതാവ് മദന്‍ തമാങ് കൊല്ലപ്പെട്ടു

ഡാര്‍ജലിങ്: ഓള്‍ ഇന്ത്യ ഗൂര്‍ഖാ ലീഗ് പ്രസിഡന്റ് മദന്‍ തമാങ് അജ്ഞാതരുടെ ആക്രമണത്തില്‍ കൊല്ലപ്പെട്ടു. ഡാര്‍ജലിങില്‍ വെള്ളിയാഴ്ച വൈകിട്ട് നടക്കാനിരുന്ന സമ്മേളനത്തിന്റെ ഒരുക്കങ്ങള്‍ പരിശോധിയ്ക്കവെ രാവിലെയാണ് തമാങിനു നേരെ ആക്രമണമുണ്ടായത്.

വാളുകൊണ്ടും കഠാര കൊണ്ടും ശരീരമാസകലം പരുക്കേറ്റ തമാങ്ങിനെ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിയ്ക്കാനായില്ല. പത്തോളം പേരാണ് ആക്രമണത്തിനു പിന്നിലെന്നാണ് വിവരം.

ആക്രമണത്തിനു പിന്നില്‍ ഗൂര്‍ഖാ മുക്തി മോര്‍ച്ച അനുയായികളാണെന്ന് ഗൂര്‍ഖാ ലീഗ് നേതാക്കള്‍ ആരോപിച്ചു. ഗൂര്‍ഖാ മേഖലയില്‍ ഭരണം നടത്തുന്നത് സംബന്ധിച്ച അഭിപ്രായ ഭിന്നതയാണ് കൊലപാതകത്തില്‍ കലാശിച്ചതെന്ന് സൂചനകളുണ്ട്.

കൊലപാതകത്തില്‍ പ്രതിഷേധിച്ച് ഡാര്‍ജലിങില്‍ ഹര്‍ത്താല്‍ ആചരിക്കുകയാണ്. തമാങ് കൊല്ലപ്പെട്ടുവെന്ന വാര്‍ത്തയറിഞ്ഞതോടെ നഗരവീഥികള്‍ വിജനമായി. സ്‌കൂളുകളും വാണിജ്യസ്ഥാപനങ്ങളും അടയ്ക്കുകയും ചെയ്തു.