യൂത്തില്‍ ആളെക്കൂട്ടാന്‍ മുരളിയോട് അഭ്യര്‍ത്ഥിച്ചു

തിരുവനന്തപുരം: യൂത്ത് കോണ്‍ഗ്രസിലേയ്ക്ക് കൂടൂതല്‍ യുവാക്കളെ ആകര്‍ഷിക്കാന്‍ ദേശീയ നേതൃത്വം കെ. മുരളീധരന്റെ സഹായം തേടിയതായി റിപ്പോര്‍ട്ട്.

യൂത്ത് കോണ്‍ഗ്രസ് അഖിലേന്ത്യാ പ്രസിഡന്റ് രാജീവ് സദൗവയാണത്രേ ഇക്കാര്യത്തില്‍ മുരളിയോട് സഹായം അഭ്യര്‍ത്ഥിച്ചത്. മുരളിക്കൊപ്പം നില്‍ക്കുന്ന പ്രവര്‍ത്തകരോട് യൂത്ത് കോണ്‍ഗ്രസില്‍ അംഗത്വം എടുക്കാന്‍ നിര്‍ദേശിക്കണമെന്നായിരുന്നു സദൗവയുടെ ആവശ്യം.

കോണ്‍ഗ്രസില്‍ തന്നെ തിരിച്ചെടുക്കുന്നതു സംബന്ധിച്ച് തീരുമാനമറിഞ്ഞശേഷം ഇക്കാര്യത്തില്‍ തന്റെ നിലപാടു വ്യക്തമാക്കാമെന്ന് മുരളി മറുപടി നല്‍കിയിട്ടുണ്ടെന്നാണ് റിപ്പോര്‍ട്ടുകള്‍ നല്‍കുന്ന സൂചന.

യൂത്ത് കോണ്‍ഗ്രസില്‍ 15 ലക്ഷം പേരെ ചേര്‍ക്കണമെന്നാണ് അഖിലേന്ത്യാ കമ്മറ്റി നിര്‍ദേശിച്ചിരുന്നത്.എന്നാല്‍ മുപ്പതിനായിരം പേരെ മാത്രമാണ് ചേര്‍ക്കാന്‍ കഴിഞ്ഞത്.

ഇതേത്തുടര്‍ന്ന് പ്രതിപക്ഷ നേതാവ് ഉമ്മന്‍ ചാണ്ടിയെയും കെപിസിസി പ്രസിഡന്റ് രമേശ് ചെന്നിത്തലയെയും ദില്ലിയിലേക്ക് വിളിച്ച് കോണ്‍ഗ്രസ് നേതൃത്വം അതൃപ്തി അറിയിച്ചിരുന്നു. കോണ്‍ഗ്രസിന് അത്ര വേരോട്ടമില്ലാത്ത തമിഴ്‌നാട്ടില്‍പോലും ഏഴര ലക്ഷം പേരെ യൂത്ത് കോണ്‍ഗ്രസില്‍ ചേര്‍ക്കാന്‍ കഴിഞ്ഞുവെന്ന് ചൂണ്ടിക്കാണിച്ചായിരുന്നു ഹൈക്കമാന്റിന്റെ വിമര്‍ശനം.

ഇതിനു ശേഷമാണ് യൂത്ത് കോണ്‍ഗ്രസ് അഖിലേന്ത്യാ നേതൃത്വം മുരളീധരന്റെ സഹായം അഭ്യര്‍ഥിച്ചത്. കേരളത്തിലെ യൂത്ത് കോണ്‍ഗ്രസിനെ ശക്തിപ്പെടുത്താന്‍ മുരളീധരന് കഴിയുമെന്ന കാര്യം തിരിച്ചറിഞ്ഞ് എഐസിസി ജനറല്‍ സെക്രട്ടറി രാഹുല്‍ ഗാന്ധിയാണ് മുരളിയെ പാര്‍ട്ടിയില്‍ തിരിച്ചെടുക്കണമെന്ന നിലപാട് സ്വീകരിച്ചതെന്ന റിപ്പോര്‍ട്ടുകള്‍ക്ക് പിന്നാലെയാണ് ദേശീയ നേതൃത്വം മുരളിയുടെ സഹായം അഭ്യര്‍ത്ഥിച്ചതായുള്ള റിപ്പോര്‍ട്ടുകള്‍ വന്നിരിക്കുന്നത്.