ഐപില്‍ ലേലം: കമ്പനിയില്‍ പവാറിന് ഓഹരി

മുംബൈ: കേന്ദ്രമന്ത്രിയും മുന്‍ ബിസിസിഐ അധ്യക്ഷനുമായ ശരദ് പവാറിനും കുടുംബത്തിനും ഐപിഎല്‍ ടീമിനായി ലേലത്തില്‍ പങ്കെടുത്ത ഫ്രാഞ്ചൈസിയില്‍ ഓഹരിയുള്ളതായി റിപ്പോര്‍ട്ട്.

പ്രമുഖ ദേശീയദിനപത്രമാണ് ഇതുസംബന്ധിച്ച വിശദാംശങ്ങള്‍ പുറത്തുവിട്ടത്. 1,716 കോടി രൂപയ്ക്ക് പുനെ ടീം ലേലത്തില്‍ സ്വന്തമാക്കാന്‍ ശ്രമം നടത്തിയ സിറ്റി കോര്‍പറേഷന്‍ എന്ന കമ്പനിയില്‍ പവാറിനും കുടുംബത്തിനും ഓഹരിയുണ്ടെന്നാണ് റിപ്പോര്‍ട്ടില്‍ പറയുന്നത്.

സിറ്റി കോര്‍പറേഷന്റെ ആകെയുള്ള 2.07 കോടി ഓഹരികളില്‍ 33.6 ലക്ഷം ഓഹരികള്‍ പവാര്‍ കുടുംബത്തിന്റേതാണെന്നാണ് റിപ്പോര്‍ട്ടില്‍ പറയുന്നത്്.

രണ്ട് കമ്പനികളിലായാണ് ഇവരുടെ ഓഹരികള്‍. ലാപ് ഫിനാന്‍സ് ആന്‍ഡ് കണ്‍സള്‍ട്ടന്‍സി, നമ്രത ഫിലിം എന്റര്‍െ്രെപസിസ് എന്നീ കമ്പനികളുടെ ഉടമസ്ഥര്‍ പവാര്‍, ഭാര്യ പ്രതിഭ, മകളും എം.പിയുമായ സുപ്രിയ സുലെ എന്നിവരാണ്.

പുതിയ രണ്ട് ടീമിനായി മാര്‍ച്ചില്‍ നടന്ന ലേലത്തില്‍ സിറ്റി കോര്‍പറേഷനും രംഗത്തുണ്ടായിരുന്നു. എന്നാല്‍ ലേലത്തില്‍ ടീം സ്വന്തമാക്കിയത് സഹാറ ഗ്രൂപ്പും റോണ്‍ഡിവൂ സ്‌പോര്‍ട്‌സുമായിരുന്നു.

ലേലത്തില്‍ പങ്കെടുത്ത് പരാജയപ്പെട്ടവരുടെ ലിസ്റ്റില്‍ വീഡിയോകോണിന്റെയും അഡാനി ഗ്രൂപ്പിന്റെയും പേരുകള്‍ മാത്രമാണ് പറഞ്ഞ്‌കേട്ടിരുന്നത്. എന്നാല്‍ അഞ്ചാമത്തെ ഗ്രൂപ്പായി ലേലത്തില്‍ സിറ്റി കോര്‍പറേഷനും രംഗത്തുണ്ടായിരുന്നുവെന്നാണ് റിപ്പോര്‍ട്ട് വ്യക്തമാക്കുന്നത്.

തനിക്ക് പങ്കാളിത്തമുള്ള കമ്പനി ലേലത്തില്‍ ടീമിനെ സ്വന്തമാക്കാന്‍ രംഗത്തുണ്ടായിരുന്നുവെന്ന റിപ്പോര്‍ട്ടുകള്‍ ശരദ് പവാറും സുപ്രിയ സുലേയും നിഷേധിച്ചു. ഇത് കെട്ടിച്ചമച്ച ആരോപണങ്ങളാണെന്ന് പവാര്‍ പറഞ്ഞു.