തിരുപ്പതിയില് ബര്മുഡയും ടീ ഷര്ട്ടും പുറത്ത്
ഹൈദരാബാദ്: തിരുപ്പതി വെങ്കിടേശ്വര ക്ഷേത്രത്തില് ഇനിമുതില് ഭക്തര്ക്ക് കര്ശന വസ്ത്ര നിയമം. ബര്മുഡ, ടി ഷര്ട്ട്, ഷോര്ട്സ് തുടങ്ങിയവ ധരിച്ച് എത്തുന്നവരെ ക്ഷേത്രത്തില് പ്രവേശിപ്പിക്കേണ്ടതില്ലെന്നു തിരുമല ദേവസ്ഥാനം തീരുമാനിച്ചു.
ഇതിനൊപ്പം തന്നെ ചെറുപാവാടകളും, കയ്യില്ലാത്ത വസ്ത്രങ്ങളും പോലുള്ള പാശ്ചാത്യ വസ്ത്രങ്ങള് ധരിച്ചെത്തുന്ന സ്ത്രീകള്ക്കും വിലക്കുണ്ടാവും.
എന്നാല് ഷര്ട്ടും പാന്റ്സും ധരിക്കുന്നവര്ക്കു വിലക്കില്ല. തീര്ഥാടകര് ക്ഷേത്രാന്തരീക്ഷത്തിനു യോജിക്കാത്ത വസ്ത്രം ധരിച്ചെത്തുന്നുവെന്ന പരാതികളുടെ അടിസ്ഥാനത്തിലാണു തീരുമാനം.
സന്ദര്ശകര് മാന്യമല്ലാത്ത വസ്ത്രം ധരിച്ചെത്തുന്നുവെന്നും ശരീരഭാഗങ്ങള് പ്രദര്ശിപ്പിക്കുന്നുവെന്നും നാലുപാടുനിന്നും പരാതികള് ഉയര്ന്നിരുന്നു. അടുത്ത രണ്ടുമാസത്തിനുള്ളില് നിയമം കര്ശനമാക്കും.
സുപ്രഭാതം, തോമല, അര്ച്ചന, കല്യാണോത്സവം തുടങ്ങിയ ചടങ്ങുകളില് പുരുഷന്മാര് മുണ്ടും പൈജാമയും സ്ത്രീകള് സാരി, ചുരിദാര് എന്നിവയും ധരിച്ചുമാത്രമേ പങ്കെടുക്കാവൂ എന്ന നിയമം 2004മുതല് തന്നെ ക്ഷേത്രത്തില് നടപ്പിലാക്കിയിരുന്നു.