അഫ്‌സല്‍ ഗുരുവിന്റെ ഹര്‍ജി തള്ളണം

ദില്ലി: 2001ലെ പാര്‍ലമെന്റ് ആക്രമണ കേസിലെ മുഖ്യപ്രതി അഫ്‌സല്‍ ഗുരുവിന്റെ വധശിക്ഷ നടപ്പാക്കണമെന്ന് കേന്ദ്ര ആഭ്യന്തര മന്ത്രാലയം ശുപാര്‍ശ ചെയ്തു. അഫ്‌സല്‍ ഗുരുവിന് വിധിച്ച വധശിക്ഷയില്‍ ഇളവ് ചെയ്യേണ്ടതില്ലെന്നു ശുപാര്‍ശ ചെയ്യുന്ന റിപ്പോര്‍ട്ട് ആഭ്യന്തര മന്ത്രാലയം രാഷ്ട്രപതിക്കു കൈമാറി.

വധശിക്ഷ നടപ്പാക്കാമെന്ന ദില്ലി സര്‍ക്കാരിന്റെ റിപ്പോര്‍ട്ട് പരിഗണിച്ച ശേഷമാണ് ആഭ്യന്തര മന്ത്രാലയം രാഷ്ട്രപതിക്ക് ശുപാര്‍ശ കൈമാറിയത്.

അഫ്‌സല്‍ ഗുരുവിന്റെ ദയാഹര്‍ജി 2006 ലാണ രാഷ്ട്രപതിക്ക് മുമ്പാകെ വന്നത്. ഇതു കേന്ദ്ര ആഭ്യന്തര മന്ത്രാലയത്തിനു നല്‍കി. തുടര്‍ന്ന് ആഭ്യന്തര മന്ത്രാലയം ദില്ലി സര്‍ക്കാരിന്റെ അഭിപ്രായം ചോദിച്ച് കത്തയക്കുകയായിരുന്നു.

വധശിക്ഷ നടപ്പാക്കാന്‍ വൈകുന്നതില്‍ ബിജെപിയടക്കമുള്ള പ്രതിപക്ഷ പാര്‍ട്ടികള്‍ കോണ്‍ഗ്രസിനെ നിശിതമായി വിമര്‍ശിച്ചിരുന്നു. 2001 ഡിസംബര്‍ 13നാണ് രാജ്യത്തെ ഞെ്ട്ടിച്ച പാര്‍ലമെന്റ് ആക്രമണമുണ്ടായത്.