തച്ചങ്കരി ആഭ്യന്തരമന്ത്രാലയത്തിന് വിശദീകരണം നല്‍കി

ദില്ലി: തനിയ്‌ക്കെതിരെയുള്ള ആരോപണങ്ങളില്‍ ഐജി ടോമിന്‍ തച്ചങ്കരി കേന്ദ്ര ആഭ്യന്തര മന്ത്രാലയത്തിന് വിശദീകരണം നല്‍കി. രഹസ്യമായി ദില്ലിയില്‍ എത്തിയാണ് തച്ചങ്കരി വിശദീകരണം നല്‍കിയതെന്നാണ് റിപ്പോര്‍ട്ട്.

ചൊവ്വാഴ്ച വൈകിട്ടാണ് തച്ചങ്കരി വിശദീകരണം നല്‍കിയത്. കേന്ദ്ര ആഭ്യന്തര സെക്രട്ടറി ജി.കെ. പിള്ള, തനിക്കു നോട്ടീസയച്ച ആഭ്യന്തര മന്ത്രാലയം അണ്ടര്‍ സെക്രട്ടറി നടരാജന്‍ എന്നിവരെ നേരില്‍ക്കണ്ടാണ് തച്ചങ്കരി വിശദീകരണം നല്‍കിയത്. രണ്ടു പേരുമായുമുള്ള കൂടിക്കാഴ്ച പത്തു മിനിറ്റോളം നീണ്ടു നിന്നു.

വൈകിട്ട് നാലിനാണ് തച്ചങ്കരി ആഭ്യന്തര മന്ത്രാലയം ഓഫീസിലെത്തിയത്. രണ്ടു മണിക്കൂര്‍ കാത്തു നിന്ന ശേഷമാണ് ജി.കെ. പിള്ളയെയും നടരാജനെയും കാണാന്‍ അനുമതി ലഭിച്ചത്. കൂടിക്കാഴ്ചയ്ക്കു ശേഷം പെട്ടെന്ന് മന്ത്രാലയത്തില്‍ നിന്നു പോവുകയും ചെയ്തു.

തച്ചങ്കരിയുടെ വിശദീകരണം ലഭിച്ചതായും പരിശോധിച്ച് ഉചിതമായ നടപടിയെടുക്കുമെന്നും ആഭ്യന്തര മന്ത്രാലയവൃത്തങ്ങള്‍ അറിയിച്ചു. എന്നാല്‍ തച്ചങ്കരിയെ മന്ത്രാലയം വിളിപ്പിച്ചിട്ടില്ല. അദ്ദേഹം ഇങ്ങോട്ടു സമീപിച്ചു വിശദീകരണം നല്‍കുകയായിരുന്നുവെന്നും ഇതുമായി ബന്ധപ്പെട്ട വൃത്തങ്ങള്‍ വ്യക്തമാക്കി.

അതിരഹസ്യമായിരുന്നു തച്ചങ്കരിയുടെ ദില്ലിഡല്‍ഹി സന്ദര്‍ശനം. സാധാരണനിലയില്‍ സംസ്ഥാന സര്‍ക്കാര്‍ പ്രതിനിധികള്‍ ദില്ലിയിലെത്തിയാല്‍ കേരള ഹൗസിലാണ് താമസിക്കാറുള്ളത്. എന്നാല്‍ ദില്ലിയില്‍ മറ്റെവിടേയോ ആയിരുന്നു ചൊവ്വാഴ്ച തച്ചങ്കരി താമസിച്ചത്. തച്ചങ്കരിയുടെ ദില്ലി സന്ദര്‍ശനത്തെക്കുറിച്ച് സംസ്ഥാന സര്‍ക്കാറിനും വിവരമൊന്നുമില്ലെന്നാണ് സൂചന.