ജോര്ജ് ഫെര്ണാണ്ടസിനെച്ചൊല്ലി വീണ്ടും തര്ക്കം
ദില്ലി: ഇന്ത്യന് രാഷ്ട്രീയത്തിലെ മുതിര്ന്ന നേതാക്കന്മാരിലൊരാളും മുന് കേന്ദ്ര മന്ത്രിയുമായിരുന്ന ജോര്ജ് ഫെര്ണാണ്ടസിനെച്ചൊല്ലിയുള്ള ബന്ധുക്കള് തമ്മിലുള്ള തര്ക്കം തെരുവിലേക്ക്. ദില്ലിയിലെ കൃഷ്ണമേനോന് മാര്ഗിലുള്ള അദ്ദേഹത്തിന്റെ ഔദ്യോഗിക വസതിയില് പ്രവേശിക്കുന്നതില്നിന്ന് സഹചാരിയായിരുന്ന ജയാ ജയ്റ്റിലിയെയും ഫെര്ണാണ്ടസിന്റെ സഹോദരന്മാരെയും തടഞ്ഞതിനെച്ചൊല്ലി കടുത്ത വാക് പോര് തന്നെ നടന്നു.
അല്ഷിമെഴ്സ് രോഗം ബാധിച്ച് അവശനായി കഴിയുന്ന ഫെര്ണാണ്ടസ് ഇപ്പോള്ഭാര്യ ലൈല കബീറിനൊപ്പം ദില്ലിയിലെ പഞ്ചശീല്പാര്ക്കിലാണ് താമസം.
ഫെര്ണാണ്ടസിനെ വിട്ടുകിട്ടണമെന്നാവശ്യപ്പെട്ട് സഹോദരന്മാരായ റിച്ചാര്ഡും മൈക്കലും ജോര്ജിന്റെ ഭാര്യ ലൈലയ്ക്കെതിരെ നല്കിയ കേസ് ദില്ലി ഹൈക്കോടതിയില് നിലവിലുണ്ട്.
ഫെര്ണാണ്ടസിന്റെ പുസ്തകങ്ങളും പെയ്ന്റിംഗുകളും വീട്ടുപകരണങ്ങളും എടുക്കാനെന്ന പേരിലാണ് റിച്ചാര്ഡും മൈക്കലും ജയയ്ക്കൊപ്പം ബുധനാഴ്ച കൃഷ്ണമേനോന് മാര്ഗിലെ വസതിയിലെത്തിയത്. ജയയെ ഉള്ളിലേക്കു കടത്തുന്നതില് വിരോധമില്ലെന്നും സഹോദരന്മാരെ അതിന് അനുവദിക്കില്ലെന്നുമായിരുന്നു വീടിന്റെ സൂക്ഷിപ്പുകാരനായ എസ്ഡി സിങിന്റെ നിലപാട്.