ഉദ്ഘാടനത്തിന് വയലാര്‍ രവിയെ വേണ്ട: കേരളം

തിരുവനന്തപുരം: തിരുവനന്തപുരം വിമാനത്താവളത്തിലെ പുതിയ ടെര്‍മിനല്‍ കേന്ദ്ര പ്രവാസികാര്യ മന്ത്രി വയലാര്‍ രവി ഉദ്ഘാടനം ചെയ്യേണ്ടെന്ന് കേരളം. ടെര്‍മിനല്‍ ഉദ്ഘാടനം പ്രധാനമന്ത്രി നിര്‍വഹിയ്ക്കട്ടെയെന്നാണ് സംസ്ഥാന സര്‍ക്കാരിന്റെ നിലപാട്. ഇതുമായി ബന്ധപ്പെട്ട് കേരളവും കേന്ദ്രവും തമ്മിലുള്ള തര്‍ക്കം രൂക്ഷമാവുകയാണ്.

ജൂലൈ 14 ന് വയലാര്‍ രവി ടെര്‍മിനല്‍ ഉദ്ഘാടനം ചെയ്യാനിരിക്കെയാണ് കേരള സര്‍ക്കാര്‍ എതിര്‍പ്പ് അറിയിച്ചിരിയ്ക്കുന്നത്.

എന്നാല്‍ 14 ന് ഉദ്ഘാടനം നിശ്ചയിച്ചത് മുഖ്യമന്ത്രി അടക്കമുള്ളവരുമായി ആലോചിച്ച ശേഷമാണെന്ന് വ്യോമയാന മന്ത്രാലയ അധികൃതര്‍ പറയുന്നു. മുഖ്യമന്ത്രി യോഗത്തില്‍ പങ്കെടുക്കാമെന്നും അറിയിച്ചിരുന്നു.

അതേസമയം പ്രധാനമന്ത്രി മന്‍മോഹന്‍ സിങ് മറ്റുപല ചടങ്ങുകളുമായി ബന്ധപ്പെട്ട് അടുത്ത് തന്നെ സംസ്ഥാനത്തെത്തുന്ന സാഹചര്യത്തില്‍ വിമാനത്താവള ടെര്‍മിനല്‍ ഉദ്ഘാടനവും അദ്ദേഹം തന്നെ നിര്‍വ്വഹിക്കട്ടെയെന്ന നിലപാടിലാണ് കേരളസര്‍ക്കാര്‍.

14ന് ചടങ്ങ് നടത്തിയാല്‍ മുഖ്യമന്ത്രിക്ക് മറ്റ് ഔദ്യോഗിക പരിപാടികളുള്ളതു കൊണ്ട് പങ്കെടുക്കാനാവില്ലെന്നും വ്യോമയാന മന്ത്രാലയത്തെ കേരള സര്‍ക്കാര്‍ അറിയിച്ചിട്ടുണ്ട്.