മൈക്കല്‍ ജാക്‌സണ്‍ന്റെ രോഗം മകനും?

ലണ്ടന്‍: പ്രശസ്തനായ അന്തരിച്ച പോപ് ഗായകന്‍ മൈക്കല്‍ ജാക്‌സന്റെ മകനും അദ്ദേഹത്തിന്റെ രോഗമാണെന്ന് റിപ്പോര്‍ട്ട്.

മൂത്ത മകന്‍ പ്രിന്‍സ് മൈക്കലിനാണ് അച്ഛനെ ബാധിച്ചിരുന്ന പാരമ്പര്യ ത്വക് രോഗമായ വിറ്റിലിഗോ ബാധിച്ചിരിക്കുന്നതായി ബ്രിട്ടീഷ് മാധ്യമങ്ങള്‍ റിപ്പോര്‍ട്ട് ചെയ്യുന്നത്.

അവധിയാഘോഷിക്കാന്‍ ഹവായ് ബീച്ചിലെത്തിയ പ്രിന്‍സ് കടല്‍ സ്‌നാനം ചെയ്യാനിറങ്ങിയപ്പോള്‍ പാപ്പരാസികള്‍ എടുത്ത ചിത്രങ്ങളാണ് സംശയത്തിനടിസ്ഥാനം.

പ്രിന്‍സിന്റെ വലതു കയ്യുടെ അടിഭാഗത്തായി വട്ടത്തില്‍ വെളുത്തിരിക്കുന്നത് ത്വക് രോഗമാണെന്നാണ് പറയുന്നത്.

മുഖത്തിന്റെയും ശരീരത്തിന്റെയും നിറം മാറുന്ന പാണ്ട് പോലൊരു രോഗമാണ് വിറ്റിലിഗോ. താന്‍ ഈ രോഗം മൂലം വലയുകയാണെന്ന് ഒരിക്കല്‍ മൈക്കല്‍ ജാക്‌സണ്‍ വെളിപ്പെടുത്തിയിരുന്നു. എന്നാല്‍ അദ്ദേഹം തുടര്‍ച്ചയായി തൊലി ബ്ലീച്ച് ചെയ്യുന്നതാണെന്നായിരുന്നു വിമര്‍ശകര്‍ പറഞ്ഞിരുന്നത്.

പാരമ്പര്യമായി വരുന്ന ഈ രോഗം ലക്ഷത്തിലൊരാള്‍ക്കുമാത്രമാണ് ഉണ്ടാവുക. എന്തായാലും പ്രിന്‍സിന് രോഗം സ്ഥിരീകരിച്ചാല്‍ പ്രിന്‍സിന്റെ പിതാവ് ജാക്‌സണ്‍ അല്ലെന്ന വിവാദത്തിന് അന്ത്യമാകും.

പ്രിന്‍സിന്റെ യഥാര്‍ത്ഥ പിതാവ് മൈക്കല്‍ ജാക്‌സണ്‍ അല്ലെന്ന് ചിലര്‍ പ്രചരിപ്പിച്ചിരുന്നു. പ്രിന്‍സും സഹോദരി പാരിസും 1996 മുതല്‍ 99 വരെ ജാക്‌സന്റെ ഭാര്യയായിരുന്ന ഡെബി റോവില്‍ ജാക്‌സണ് ജനിച്ച മക്കളാണ്.