ഇടതു സ്വതന്ത്രരെ സൂക്ഷിയ്ക്കണം: കെസിബിസി
കൊച്ചി: തദ്ദേശ സ്വയംഭരണ തെരഞ്ഞെടുപ്പില് നിരീശ്വരവാദ പ്രസ്ഥാനങ്ങള്ക്കെതിരെ അണിചേരാന് കേരള കാത്തലിക് ബിഷപ്പ് കൗണ്സില് (കെസിബിസി) ആഹ്വാനം. കഴിഞ്ഞ കെസിബിസി യോഗത്തിലാണ് ഇതു സംബന്ധിച്ചു തീരുമാനമെടുത്തത്.
ഇതു സംബന്ധിച്ച് കൗണ്സില് അംഗീകരിച്ച പ്രമേയം എല്ലാ രൂപതകള്ക്കും അയച്ചുകൊടുക്കും. ഈ മാസം 18നുള്ള കുര്ബാന മധ്യേ ഇടയലേഖനം പള്ളികളില് വായിക്കും.
സ്വതന്ത്രസ്ഥാനാര്ഥികളെ തെരഞ്ഞെടുക്കുന്നത് അപകടകരമാണ്. വ്യക്തിപ്രഭാവമുള്ള സ്വതന്ത്രരെ അണിനിരത്തി നിരീശ്വരവദികള് വിശ്വാസികള്ക്കിടയിലേക്ക് പ്രവേശിക്കാന് ശ്രമിക്കുകയാണ്.
ഈ നീക്കം തടയണം. വ്യക്തി പ്രഭാവത്തിലുപരി അവര്ക്കു പിന്നിലുള്ള പ്രത്യയശാസ്ത്ര ശക്തികളെയാണ് തിരിച്ചറിയേണ്ടത്- കെസിബിസി അറിയിച്ചു.
നിരീശ്വരവാദികളുടെ പ്രത്യയശാസ്ത്രവുമായി സഭയുടെ പ്രത്യയശാസ്ത്രത്തിന് യോജിക്കാനാവില്ല. സഭ ദൈവവിശ്വാസത്തിലുള്ളതും വിശ്വാസം സംരക്ഷിക്കാനുള്ളതുമാണെന്ന് കെ.സി.ബിസി മാധ്യമ വക്താവ് ഫാദര് സ്റ്റീഫന് ആലത്തറ പറഞ്ഞു.