നമ്മള്‍ കഴിയ്ക്കുന്ന വിഷം എന്താണ്

അറിയാതെ നാം ദിവസവും കഴിയ്ക്കുന്ന വിഷത്തെക്കുറിച്ച് എപ്പോഴെങ്കിലും ചിന്തിച്ചിട്ടുണ്ടോ? സാദ്ധ്യത കുറവാണ്.

മികച്ചതെന്ന് കരുതി നാം വാങ്ങി കഴിയ്ക്കുന്ന പച്ചക്കറിയിലും എന്തിന് കുടിയ്ക്കുന്ന വെള്ളത്തിലും എത്രത്തോളം കീട നാശിനികളുണ്ട് എന്ന് ആലോചിച്ചിട്ടുണ്ടോ. ഇവയില്‍ മാത്രമല്ല. നാം വാങ്ങിയ്ക്കുന്ന അരിയിലും ഗോതമ്പിലും വരെ കീടനാശിനികളുടെ അളവ് അനുവദനീയമായതിലും എത്രയോ കൂടുതലാണ്.

ഒരു അമേരിയ്ക്കക്കാരന്റെ ഉള്ളില്‍ ചെല്ലുന്നതിന്റെ 40 ഇരട്ടി കീടനാശിനികള്‍ ഇന്ത്യാക്കാരന്റെ ഉള്ളില്‍ ചെല്ലുന്നുണ്ടെന്നാണ് കണക്ക്.

പച്ചക്കറികടയില്‍ പോകുമ്പോള്‍ തുടുത്ത പുഴുക്കളില്ലാത്ത പച്ചക്കറി നോക്കി എടുക്കാന്‍ നമുക്കൊക്കെ എന്ത് വ്യഗ്രതയാണ്. പക്ഷേ ആ പച്ചക്കറികള്‍ എന്തുകൊണ്ടാണ് ഇങ്ങനെ തുടുത്ത് പുഴുക്കളില്ലാതെ ഇരിയ്ക്കുന്നതെന്ന് നാം ചിന്തിയ്ക്കാറില്ല. മറ്റൊന്നുമല്ല ഇതിന് കാരണം. അതില്‍ ഉപയോഗിച്ച കീടനാശിനികളാണ്.

തുടുത്തതല്ലാത്ത പുഴുക്കളുള്ള പച്ചക്കറിയില്‍ കീടനാശിനിയുടെ അംശം കുറവായിരിയ്ക്കും. അടുത്ത തവണ പച്ചക്കറി വാങ്ങുമ്പോള്‍ ഇത് മനസ്സില്‍ കരുതുക.

ദില്ലി ആസ്ഥാനാക്കി പ്രവര്‍ത്തിയ്ക്കുന്ന ദ് എനര്‍ജി ആന്‍ഡ് റിസോര്‍സസ് ഇന്‍സ്റ്റിട്യൂട്ടിലെ രമേശ് മേനോന്‍ 2004 ല്‍ തയ്യാറാക്കിയ ഈ ഡോക്കുമെന്ററി കാണൂ. ഇന്ത്യയിലെ കീടനാശിനി ഉപയോഗത്തെക്കുറിച്ചാണ് ഈ വാര്‍ത്താ ചിത്രം. എന്‍ഡോസല്‍ഫാന്‍ എങ്ങനെ കാസര്‍കോട്കാരെ ബാധിച്ചെന്നും ഇതില്‍ രമേശ് പറയുന്നു. കണ്ട് പേടിയ്ക്കരുതെന്ന് ഇപ്പോഴേ പറയുന്നു.