വ്യാഴാഴ്ച കെഎസ്യു വിദ്യാഭ്യാസ ബന്ദ്
തിരുവനന്തപുരം: കോണ്ഗ്രസിന്റെ വിദ്യാര്ത്ഥി വിഭാഗമായ കെഎസ്യു 2010 ജൂലൈ എട്ട് വ്യാഴാഴ്ച വിദ്യാഭ്യാസ ബന്ദ് ആചരിയ്ക്കുന്നു. ബുധനാഴ്ച തിരുവനന്തപുരം പാളയത്ത് വച്ച് കെ എസ് യു പ്രവര്ത്തകരെ പൊലീസ് തല്ലിയിരുന്നു. പൊലീസിന് നേരെ അതിക്രമം കാണിച്ചതായിരുന്നു ഇതിന് കാരണം.
ജില്ലയിലെങ്ങും പ്രകടനങ്ങള് നടത്താനും കെഎസ്യു തീരുമാനിച്ചിട്ടുണ്ട്. സ്വാശ്രയ വിദ്യാഭ്യാസ സ്ഥാപനങ്ങളോടുള്ള സര്ക്കാറിന്റെ ഉദാര നയത്തില് പ്രതിഷേധിച്ച് ബുധനാഴ്ച കെഎസ്യു പ്രവര്ത്തകര് തിരുവനന്തപുരം നഗരത്തില് പ്രകടനം നടത്തിയിരുന്നു.
നിയമസഭാ കവാടത്തിലേയ്ക്ക് മാര്ച്ച് ചെയ്ത പ്രവര്ത്തകരെ പൊലീസ് പാളയത്ത് വച്ച് തടഞ്ഞു. തുടര്ന്നാണ് വിദ്യാര്ത്ഥികള്ക്കെതിരെ പൊലീസ് ലാത്തിപ്രയോഗം നടത്തിയത്. പൊലീസ് നടപടിയില് 11 കെഎസ്യു പ്രവര്ത്തകര്ക്ക് പരിക്കേറ്റു. കെഎസ്യു പ്രസിഡണ്ട് ഷാഫി പറമ്പിലും ഇതില് പെടും. ഇവരെ തിരുവനന്തപുരം മെഡിയ്ക്കല് കോളെജ് ആശുപത്രിയില് പ്രവേശിപ്പിച്ചു. ഷാഫി പറമ്പിലിനെതിരെ പൊലീസ് കേസെടുത്തിട്ടുണ്ട്.