അതിരപ്പിള്ളി: സംസ്ഥാനം പിറകോട്ടില്ല

തിരുവനന്തപുരം: അതിരപ്പിള്ളി ജല വൈദ്യുത പദ്ധതിയില്‍ നിന്ന് സംസ്ഥാനം പിന്നാക്കം പോകുന്ന പ്രശ്നമില്ലെന്ന് വൈദ്യുതി വകുപ്പ് മന്ത്രി എകെ ബാലന്‍ നിയമസഭയെ അറിയിച്ചു. മന്ത്രിസഭയിലെ മറ്റാര് എതിര്‍ക്കുന്നതും വൈദ്യുതി വകുപ്പിന് പ്രശ്നമല്ല.

അതിരപ്പള്ളി പദ്ധതിയെക്കുറിച്ചുള്ള ജി കാര്‍ത്തികേയന്റെ സബ്മിഷന് മറുപടി പറയുകയായിരുന്നു മന്ത്രി. ഈ എല്‍ഡിഎഫ് സര്‍ക്കാരും കഴിഞ്ഞ യുഡിഎഫ് സര്‍ക്കാരും പദ്ധതിയ്ക്ക് അനുകൂലമായിരുന്നു. എന്നാല്‍ ഈ സര്‍ക്കാരിലെ വനം വകുപ്പ് മന്ത്രി ബിനോയ് വിശ്വം പദ്ധതിയെ എതിര്‍ക്കുന്നുണ്ട്. ഇത് ലക്ഷ്യം വച്ചായിരുന്നു മന്ത്രിയുടെ പരാമര്‍ശം.

ഈ വര്‍ഷം മികച്ച മഴ കിട്ടിയതുകൊണ്ട് വൈദ്യുതി നിയന്ത്രണം ഏര്‍പ്പെടുത്തേണ്ടി വരില്ലെന്നും മന്ത്രി പറഞ്ഞു. വേണ്ടത്ര വൈദ്യുതി കേന്ദ്ര പൂളില്‍ നിന്ന് ലഭിച്ചിട്ടുമുണ്ട്. സംസ്ഥാനത്ത് എങ്ങും സി എഫ്എല്‍ ബള്‍ബുകള്‍ വിതരണം ചെയ്യുന്നത് വഴി 230 മെഗാവാട്ട് വൈദ്യുതി ലാഭിയ്ക്കാനാവുമെന്നാണ് വകുപ്പിന്റെ കണക്ക്.