വ്യഭിചാരം: കല്ലെറിഞ്ഞു കൊല്ലല്‍ നിര്‍ത്തിവച്ചു

ടെഹ്‌റാന്‍: വ്യഭിചാരക്കുറ്റത്തിന് പിടികൂടിയ സ്ത്രീയെ പൊതുസ്ഥലത്ത് കല്ലെറിഞ്ഞ് കൊല്ലുന്ന ശിക്ഷ നടപ്പാക്കുന്നത് ഇറാന്‍ കോടതി താത്കാലികമായി നിര്‍ത്തിവെച്ചു.

പാശ്ചാത്യ രാജ്യങ്ങളുടെയും മനുഷ്യാവകാശ സംഘടനകളുടെയും പ്രതിഷേധം ശക്തമായ സാഹചര്യത്തിലാണ് കിഴക്കന്‍ അസര്‍ബൈജാന്‍ പ്രവിശ്യാകോടതി തലവന്‍ മാലിക് അജ്ദാര്‍ ഷരീഫി ശിക്ഷ നടപ്പാക്കുന്നത് നിര്‍ത്തിവെച്ചത്.

കോടതി മേധാവി തീരുമാനിക്കുന്ന സമയത്ത് ശിക്ഷ നടപ്പാക്കുമെന്നും ഷരീഫി പറഞ്ഞു. സാകിനെ മുഹമ്മദി അഷ്തിയാനി എന്ന 43കാരിയെയാണ് വ്യഭിചാരക്കുറ്റത്തിന് കല്ലെറിഞ്ഞുകൊല്ലാന്‍ കോടതി വിധിച്ചത്.

രണ്ട് പുരുഷന്മാരുമായി അവിഹിത ബന്ധം പുലര്‍ത്തിയ മുഹമ്മദി അഷ്തിയാനി കുറ്റക്കാരിയാണെന്ന് 2006 മെയ് 16ന് കോടതി കണ്ടെത്തിയിരുന്നു. ഇതിന് ശിക്ഷയായി അവര്‍ക്ക് 99 ചാട്ടയടി കിട്ടി.

2006 സപ്തംബറില്‍ മുഹമ്മദി അഷ്തിയാനിയുടെ ഭര്‍ത്താവിന്റെ കൊലയുമായി ബന്ധപ്പെട്ട് ഒരാളെ വിചാരണ ചെയ്യുമ്പോഴാണ് ഭര്‍ത്താവുണ്ടായിരിക്കെ വ്യഭിചാരത്തിലേര്‍പ്പെട്ടു എന്ന കുറ്റം വീണ്ടും ഇവരുടെ മേല്‍ ചുമത്തപ്പെട്ടതെന്ന് മനുഷ്യാവകാശ സംഘടനയായ ആംനസ്റ്റി ഇന്റര്‍നാഷണല്‍ പറഞ്ഞു.

എന്നാല്‍, ഭര്‍ത്താവിനെ കൊന്നതുള്‍പ്പെടെ ഒട്ടേറെ കുറ്റങ്ങള്‍ ചെയ്തയാളാണ് മുഹമ്മദി അഷ്തിയാനി എന്ന് അജ്ദര്‍ ഷരീഫി ആരോപിച്ചു.

അന്താരാഷ്ട്ര സമ്മര്‍ദത്തെത്തുടര്‍ന്ന് കല്ലെറിഞ്ഞുകൊല്ലല്‍ ഇറാന്‍ കോടതി ഒരിക്കല്‍ റദ്ദ് ചെയ്തിരുന്നു. എന്നാല്‍, ചില പ്രവിശ്യാകോടതികള്‍ ഇപ്പോഴും ഇത് നടപ്പാക്കുന്നുണ്ട്.