രൂപയ്ക്ക് അങ്ങനെ ചിഹ്നമായി

ദില്ലി: ഒടുവില്‍ രൂപയ്ക്കും ചിഹ്നമായി. ഡോളറിനും, പൗണ്ടിനും ഉള്ളപോലെ രൂപയ്ക്ക് ഉപയോഗിയ്ക്കേണ്ട അടയാളം തിരഞ്ഞെടുത്തത് പ്രത്യേക ജൂറിയാണ്. മുംബൈ ഐ ഐ ടുയിലെ ബിരുദാന്തര വിദ്യാര്‍ത്ഥിയായ ഡി ഉദയകുമാറിന്റേതാണ് ഈ അടയാളം. മന്ത്രിസഭയുടെ അംഗീകാരവും ഇതിന് ലഭിച്ചുകഴിഞ്ഞു.

ദേവനാഗരി അക്ഷരമാലയിലെ 'ര' (र) എന്ന അക്ഷരത്തിനും ഇംഗ്ലീഷിലെ 'R' എന്ന അക്ഷരത്തിന്റെ ആദ്യ വര മാറ്റിയതിനും സമാനമായ രൂപത്തില്‍ കുറുകേ ഒരു വര ചേര്‍ത്തതാണ് ഈ അടയാളം. ഒട്ടേറെ പേര്‍ നല്‍കിയ അടയാളങ്ങളില്‍ നിന്ന് അഞ്ചെണ്ണം തിരഞ്ഞെടുത്തിരുന്നു. അതില്‍ ഒന്നാണ് ജൂറി അവസാനമായി തിരഞ്ഞെടുത്തത്. ഈ അഞ്ചെണ്ണത്തില്‍ തലശ്ശേരിക്കാരനായ അദ്ധ്യാപകന്‍ കെ കെ ഷിബിന്‍ നല്‍കിയ ഡിസൈനും ഉണ്ടായിരുന്നു.

കഴിഞ്ഞ ബജറ്റിലാണ് രൂപയ്ക്ക് അടയാളമുണ്ടാക്കാന്‍ തീരുമാനിച്ചതായി ധനമന്ത്രി പ്രണബ് മുഖര്‍ജി പ്രഖ്യാപിച്ചത്. തിരഞ്ഞെടുക്കുന്ന അടയാളം രൂപം നല്‍കിയ ആള്‍ക്ക് രണ്ടര ലക്ഷം രൂപ കിട്ടും.