നീരാളി പ്രവാചകന്‍ കളി വിട്ട് കാര്യത്തിലേയ്ക്ക്

മോസ്‌കോ: ഫുട്‌ബോള്‍ ലോകകപ്പിലെ ചാമ്പ്യന്മാരെ കൃത്യമായി പ്രവചിച്ച് വിഐപി പ്രവാചകനായ പോള്‍ നീരാളി രാഷ്ട്രീയ പ്രചവനത്തിലും ഒരു കൈനോക്കുന്നു.

റഷ്യയുടെ അടുത്ത പ്രസിഡന്റ് ആരെന്നു പോള്‍ പ്രവചിച്ചുകഴിഞ്ഞു. ഭദ്രമായി സീല്‍ ചെയ്ത കവറിലുള്ള പ്രവചനം അറിയാന്‍ പക്ഷേ, 2012ലെ തിരഞ്ഞെടുപ്പു കഴിയുംവരെ കാത്തിരിക്കണം.

അതിനുശേഷമേ പ്രവചനഫലം പരസ്യമായി പ്രഖ്യാപിക്കുകയുള്ളു. 'പ്രവ്ദ ദിനപത്രമാണ് പോളിനെ സമീപിച്ചു പ്രവചനം സ്വന്തമാക്കിയത്.

ഇപ്പോഴത്തെ പ്രസിഡന്റ് ദിമിത്രി മെദ്വെദേവിന്റെയും പ്രധാനമന്ത്രി വ്‌ളാഡിമര്‍ പുടിന്റെയും പേരെഴുതിയ കടലാസുകളാണു പോളിനു മുന്നില്‍ വച്ചത്. പോള്‍ ഒന്നില്‍ സ്പര്‍ശിച്ചു.

ഇതേസമയം, സ്‌പെയിനിന്റെ ലോകകപ്പ് വിജയം പ്രവചിച്ച പോള്‍ ജര്‍മനിയില്‍ സുരക്ഷിതനല്ലാത്തതിനാല്‍ കൈമാറണമെന്ന സ്‌പെയിനിന്റെ ആവശ്യം ജര്‍മനിയിലെ സീ ലൈഫ് അക്വേറിയം തള്ളിയിട്ടുണ്ട്.

ഒബര്‍ഹൌസനിലെ കടല്‍ ജീവി സംരക്ഷണ കേന്ദ്രത്തില്‍ കഴിയുന്ന പോളിന് ജര്‍മ്മനി സെമിയില്‍ തോല്‍ക്കുമെന്ന പ്രവചനം നടത്തിയ ശേഷം ജര്‍മ്മന്‍ ആരാധകരുടെ വധ ഭീഷണി ഉണ്ടായിരുന്നു.

എന്നാല്‍, സ്‌പെയിന്‍ ലോകകപ്പ് നേടുമെന്ന പ്രവചനം നടത്തിയത് സത്യമായതോടെ പോളിന് ആ രാജ്യത്ത് ദൈവീക പരിവേഷം നേടുകയായിരുന്നു.