കൊച്ചിമെട്രോ:ഇപ്പോഴും ശുഭപ്രതീക്ഷയെന്ന് ശ്രീധരന്‍

ദില്ലി: കൊച്ചി മെട്രോ റെയില്‍ പദ്ധതി സാധ്യമാകുന്ന കാര്യത്തില്‍ ഇപ്പോഴും ശുഭപ്രതീക്ഷയുണ്ടെന്ന് ദില്ലി മെട്രോ റെയില്‍ ചെയര്‍മാന്‍ ഇ ശ്രീധരനും മുഖ്യമന്ത്രി വിഎസ് അച്യുതാനന്ദനും പറഞ്ഞു. കൊച്ചി മെട്രോ റെയില്‍ പദ്ധതി സംബന്ധിച്ച് കേരളാ ഹൗസില്‍ കൂടിക്കാഴ്ച നടത്തിയശേഷം സംസാരിക്കുകയായിരുന്നു മുഖ്യമന്ത്രിയും ഇ ശ്രീധരനും.

ദില്ലി മാതൃകയില്‍ കേന്ദ്ര-സംസ്ഥാന പങ്കാളിത്തത്തോടെ പദ്ധതി നടപ്പാക്കാന്‍ കഴിയുമെന്നാണ് പ്രതീക്ഷയെന്ന് ഇ ശ്രീധരന്‍ പറഞ്ഞു. ഈ കാര്യത്തില്‍ കേന്ദ്ര ആസൂത്രണ കമ്മീഷന്റെ രേഖാമൂലമുള്ള ഉറപ്പ് നിലനില്‍ക്കുന്നുണ്ടെന്ന്അദ്ദേഹം ചൂണ്ടിക്കാട്ടി.

മുഖ്യമന്ത്രിയും ഇ ശ്രീധരനും കേന്ദ്ര നഗരവികസന മന്ത്രി ഇ.ജയ്പാല്‍ റെഡ്ഡിയെ ഉച്ചയ്ക്കുശേഷം കാണുന്നുണ്ട്. കേന്ദ്ര ആശൂത്രണ കമ്മീഷന്റെ നിലപാടു മൂലമാണ് പദ്ധതി നീളുന്നത്.

പദ്ധതി കേന്ദ്ര-സംസ്ഥാന പങ്കാളിത്തടെ നടത്തണമെന്ന സംസ്ഥാനത്തിന്റെ നിലപാടാണ് ആസൂത്രണ കമ്മീഷന്‍ എതിര്‍ക്കുന്നത്. പൊതു-സ്വകാര്യ പങ്കാളിത്തത്തോടെ പദ്ധതി നടപ്പാക്കണമെന്നാണ് ആസൂത്രണ കമ്മീഷന്റെ നിലപാട്.