ഗള്‍ഫില്‍ കെ.എസ്‌.എഫ്‌.ഇയുടെ ഉപശാഖ തുടങ്ങും

കൊച്ചി: ഗള്‍ഫില്‍ കെ.എസ്‌.എഫ്‌.ഇയുടെ ഉപശാഖ തുടങ്ങുമെന്ന്‌ ധനമന്ത്രി തോമസ്‌ ഐസക്‌ പറഞ്ഞു. കെ.എസ്‌.എഫ്‌.ഇ പൊന്നോണ ചിട്ടികള്‍ 2010ന്റെ സംസ്‌ഥാനതല ഉദ്‌ഘാടനം നിര്‍വഹിക്കുകയായിരുന്നു മന്ത്രി.

ഗള്‍ഫില്‍ ഉപസ്‌ഥാപനം തുടങ്ങാനാവശ്യമായ അപേക്ഷ ധനകാര്യ വകുപ്പിനും ആര്‍ബിഐയക്കും നല്‍കിയിട്ടുണ്ട്‌. ഇതിന് പുറമേ രാജ്യാന്തര ഏജന്‍സികള്‍ക്കും സര്‍ക്കാരുകള്‍ക്കും വേണ്ട അപേക്ഷകള്‍ നല്‍കിയിട്ടുണ്ട്. എപ്പോള്‍ സ്ഥാപനം തുടങ്ങും എന്ന് പറയാറായിട്ടില്ല.ഒരുവര്‍ഷത്തിനുശേഷം ആരംഭിക്കാനാകുമെന്നാണു പ്രതീക്ഷ - മന്ത്രി പറഞ്ഞു.

കെഎസ്എഫ്ഇ വാണിജ്യാടിസ്ഥാനത്തിലാണ് ഇപ്പോള്‍ പ്രവര്‍ത്തിയ്ക്കുന്നത്. മുമ്പ്‌ കെ.എസ്‌.എഫ്‌.ഇയുടെ വരുമാനം 4000 കോടിയായിരുന്നത്‌ 10000 കോടിയിലേറെയായി ഉയര്‍ന്നിട്ടുണ്ട്‌. പ്രവര്‍ത്തന രീതിയുടെ വ്യത്യാസമാണ് ഈ വരുമാന വളര്‍ച്ചയ്ക്ക് കാരണം.

കെ.എസ്‌.എഫ്‌.ഇയുടെ 1700 കോടിയോളം രൂപ ട്രഷറിയില്‍ നിക്ഷേപമുണ്ട്‌. ഇതു സംസ്‌ഥാനത്തിന്റെ വികസന പ്രവര്‍ത്തനങ്ങള്‍ക്ക്‌ ഉപയോഗിക്കാനാവുന്നതായി ധനമന്ത്രി പറഞ്ഞു.