ഐപിഎല്‍ ടീം: സുനന്ദ ഓഹരി മറിച്ചുവിറ്റെന്ന്

ദില്ലി: കൊച്ചി ഐപിഎല്‍ ടീമിന്റെ ഉടമസ്ഥരായ റോണ്‍ഡിവൂസ് കണ്‍സോര്‍ഷ്യത്തിലെ സ്വന്തം ഓഹരികള്‍ സുനന്ദ പുഷ്‌കര്‍ മറിച്ചുവിറ്റതായി റിപ്പോര്‍ട്ട്. വില്പനയാണോ കൈമാറ്റമാണോ നടന്നതെന്നത് സ്ഥിരീകരിച്ചിട്ടില്ല.

ഒരു ടെലിവിഷന്‍ ചാനലാണ് ഇക്കാര്യം വെളിപ്പെടുത്തിയത്.

കൊച്ചി ഐപിഎല്‍ ടീമിന്റെ സ്പോണ്‍സര്‍ഷിപ്പ് സംബന്ധിച്ച് ബിസിസിഐയ്ക്ക് കിട്ടിയ കത്തില്‍ ഒപ്പിട്ടിരിയ്ക്കുന്നത് ദുബൈയിലെ എന്‍ആര്‍ഐ ആയ ദിലീപ് കുമാറാണ്. ഇദ്ദേഹത്തിന്റെ പേര് നേരത്തേ ഉടമസ്ഥരുടെ പട്ടികയില്‍ ഉണ്ടായിരുന്നില്ല.

ടീമിന്റെ സ്പൊണ്‍സര്‍മാരെ കണ്ടെത്താനുള്ള ചുമതല നേരത്തേ സുനന്ദ പുഷ്കറിനായിരുന്നു. ഇപ്പോള്‍ സ്പൊണ്‍സര്‍ഷിപ്പ് സംബന്ധിച്ച് നല്‍കിയ കത്തില്‍ ദിലീപ് കുമാര്‍ ഒപ്പിട്ടിരിയ്ക്കുന്നതാണ് സുനന്ദ ഓഹരി കൈമാറിയതായി കരുതാന്‍ കാരണം. എന്നാല്‍ ഇക്കാര്യത്തില്‍ മറ്റ് സ്ഥിരീകരണങ്ങള്‍ ഒന്നും ലഭിച്ചിട്ടില്ല.

കൊച്ചി ടീമിന്റെ സ്പൊണ്‍സര്‍മാരെ കണ്ടെത്തുന്നതിന്റെ ചുമതല ജയന്ത് ഭോകറെ, ശ്യാം ഹരിദാസ് എന്നിവരെ ചുമതലപ്പെടുത്തിയെന്ന് കാണിച്ചാണ് ദിലീപ് കുമാര്‍ ബിസിസിഐയ്ക്ക് കത്ത് നല്‍കിയിരിയ്ക്കുന്നത്. ഇന്ത്യയിലും ഗള്‍ഫ് ദേശത്തും സ്പൊണ്‍സര്‍മാരെ കണ്ടെത്തുകയാണ് ഇവരുടെ ചുമതല.