എന്നെ വധിക്കാന്‍ സിപിഎം ആത്മഹത്യാസ്‌ക്വാഡ്: മമത

കൊല്‍ക്കത്ത: തന്നെ വധിക്കാന്‍ സിപിഎം ആത്മഹത്യാ സ്‌ക്വാഡിന് രൂപം നല്‍കിയിട്ടുണ്ടെന്ന് കേന്ദ്ര റയില്‍വെ മന്ത്രി മമത ബാനര്‍ജി. ഇതിനായി സിപിഎം മറ്റുചില രാഷ്ട്രീയ പാര്‍ട്ടികളുമായി ചേര്‍ന്നുവെന്നും മമത ആരോപിച്ചു.

രാഷ്ട്രീയപരമായി എതിരിടാന്‍ സാധിക്കാത്തതിനാലാണ് എന്നെ ഇല്ലാതാക്കാന്‍ ശ്രമിക്കുന്നത്. പാര്‍ട്ടികള്‍ നടത്തിയ ഗൂഡാലോചനയില്‍ ആത്മഹത്യാ സ്‌ക്വാഡ് രൂപീകരിക്കാനും അതിനായി എന്ത് ചെലവും വഹിക്കാനും സിപിഎം തയ്യാറായി. മാധ്യമ പ്രവര്‍ത്തകര്‍ക്ക് ഇക്കാര്യത്തെ കുറിച്ച് അന്വേഷിക്കാം-മമത പറഞ്ഞു.

തൃണമൂല്‍ യൂത്ത് കോണ്‍ഗ്രസ് പ്രസിഡന്റ് ശുഭേന്ദു അധികാരിയെയും തന്നോടൊപ്പം വകവരുത്താനാണ് സിപിഎമ്മിന്റെ ശ്രമമെന്ന് മമത ബാനര്‍ജി ആരോപിക്കുന്നു.

സിപിഎം മന്ത്രിമാരും നേതാക്കളും എന്നെ നിരീക്ഷിച്ചുകൊണ്ടിരിക്കുകയാണ്. പടിഞ്ഞാറന്‍ മിഡ്‌നാപ്പൂരില്‍ സിപിഎം സായുധ കേഡറുകള്‍ ആരംഭിച്ചതിനു പിന്നിലെ ലക്ഷ്യവും ഞാനാണ്- മമത ചൂണ്ടിക്കാട്ടി.

കൊല്‍ക്കത്തയില്‍ ശനിയാഴ്ച നടന്ന വാര്‍ത്താ സമ്മേളനത്തില്‍ സംസാരിക്കുകയായിരുന്നു മമത.