മുംബൈക്കാര്‍ മത്സ്യം കഴിക്കരുതെന്ന് മുന്നറിയിപ്പ്

മുംബൈ: മുംബൈ നഗരവാസികള്‍ ഇനിയൊരറിയിപ്പ് ഉണ്ടാവുന്നത് വരെ മത്സ്യം കഴിക്കരുത് എന്ന് നഗരസഭയുടെ മുന്നറിയിപ്പ്. തീരത്തിനടുത്ത് അപകടത്തില്‍പ്പെട്ട ചരക്ക് കപ്പലില്‍ നിന്ന് എണ്ണ ചോരുന്നതാണ് ഇതിന് കാരണം. എണ്ണചോര്‍ച്ച് പാരിസ്ഥിതിക പ്രശ്‌നമുയര്‍ത്തുന്നുണ്ടെന്ന് അധികൃതര്‍ പറയുന്നു.

എംവി ഖാലിജ 3 എന്ന കപ്പലുമായി കൂട്ടിയിടിച്ച എംഎസ്‌സി ചിത്ര എന്ന കപ്പല്‍ ഇപ്പോള്‍ മുങ്ങിക്കൊണ്ടിരിക്കുകയാണ്. മുങ്ങുന്ന കപ്പലില്‍ നിന്നുള്ള എണ്ണ ചോര്‍ച്ചയാണ് പാരിസ്ഥിതിക ഭീഷണിയാവുന്നത്.

മുംബൈ തീരത്തിനടുത്ത് മത്സ്യബന്ധനം നടത്തുന്നതിനെതിരെയും തീരസംരക്ഷണ സേന മുന്നറിയിപ്പ് നല്‍കി. തീരസംരക്ഷണ സേനയുടെ രണ്ട് കപ്പലുകളും അഞ്ച് ഹെലികോപ്ടറുകളും അപകടസ്ഥലത്ത് നിരീക്ഷണം നടത്തുന്നുണ്ട്.

ശനിയാഴ്ച രാവിലെ 9:45 ന് ആയിരുന്നു കണ്ടെയിനറുകളുമായി വന്ന ചരക്കു കപ്പലുകള്‍ അപകടത്തില്‍ പെട്ടത്. അടിയന്തിര സന്ദേശം ലഭിച്ചതിനെ തുടര്‍ന്ന് തീരസംരക്ഷണ സേന രണ്ട് കപ്പലുകളില്‍ നിന്നുമായി 33 തൊഴിലാളികളെ രക്ഷപെടുത്തിയിരുന്നു.