മൈക്കല്‍ ജാക്‌സന്‍ മര്യാദകെട്ടവനെന്ന് പരിശീലക

ലണ്ടന്‍: പോപ് ഇതിഹാസം മൈക്കല്‍ ജാക്‌സനുമായി ബന്ധപ്പെട്ട് വാര്‍ത്തകളും വിവാദങ്ങളും അദ്ദേഹത്തിന്റെ മരണശേഷവും അവസാനിക്കുന്നില്ല.

ജാക്‌സണിനെതിരെ അദ്ദേഹത്തിന്റെ ശബ്ദപരിശീലക രംഗത്തെത്തിയിരിക്കുകയാണിപ്പോള്‍. ജനസമ്മിതി വളരെയുണ്ടെങ്കിലും മൈക്കില്‍ ജാക്‌സന്‍ മര്യാദകെട്ടയാളെന്നാണ് പരിശീലകയായിരുന്ന വൈവി ബര്‍ണറ്റ് പറയുന്നത്.

ബ്രിട്ടനിലെ ദ എക്‌സ് ഫാക്ടര്‍ എന്ന ടിവി പരിപാടിയിലാണ് വൈവി ഇങ്ങനെ തുറന്നടിച്ചിരിക്കുന്നത്.ഒരു സംഗീത പരിപാടിയില്‍ വച്ച് തന്റെ സ്റ്റാഫിനെ ഒഴിവാക്കാനായുള്ള ജാക്‌സന്റെ പെരുമാറ്റം തന്നെ സ്തബ്ധയാക്കിയെന്നാണ് ബര്‍ണറ്റ് പറയുന്നത്.

സ്റ്റാഫുമായി സംസാരിക്കുന്നത് ഒഴിവാക്കാന്‍ മന:പൂര്‍വം ശ്രമിച്ച ജാക്‌സന്‍, തനിക്ക് സ്‌റ്റേജില്‍ നിന്ന് ഡ്രസിംഗ് റൂമിലേക്ക് പോകാനായി നിര്‍മ്മിച്ചിട്ടുള്ള തുരങ്കത്തില്‍ തന്നെയാണ് കൂടുതല്‍ സമയവും കഴിച്ചുകൂട്ടിയത്.

എല്ലാവരും ജാക്‌സന്റെ അടുത്ത് ചെന്നെങ്കിലും ആരോടും, അദ്ദേഹത്തിന്റെ തൊട്ടടുത്ത് നിന്നവരോട് പോലും, അദ്ദേഹം സംസാരിച്ചില്ല. ഞാന്‍ കണ്ടിട്ടുള്ളതില്‍ വച്ച് ഏറ്റവും മര്യാദയില്ലാത്ത പ്രമുഖനാണ് ജാക്‌സന്‍-ബര്‍ണറ്റ് പറയുന്നു.