ബസ് റാഞ്ചി ടൂറിസ്റ്റുകളെ ബന്ദികളാക്കി

മനില: ഫിലിപ്പീന്‍സിലെ മനിലയില്‍ മുന്‍ പൊലീസ് ഉദ്യോഗസ്ഥന്‍ വിദേശ ടൂറിസ്റ്റുകള്‍ സഞ്ചരിച്ച ബസ് തട്ടിയെടുത്ത് യാത്രക്കാരെ ബന്ദികളാക്കി. ഹോങ്കോങില്‍ നിന്നുള്ള ഇരുപത്തിയൊന്ന് ടൂറിസ്റ്റുകള്‍ യാത്ര ചെയ്തിരുന്ന ബസ്സാണ് ആയുധധാരിയായ മുന്‍ പൊലീസുകാരന്‍ തട്ടിയെടുത്തത്. മധ്യസ്ഥരുമായി ചര്‍ച്ച നടത്തിയതിനെ തുടര്‍ന്ന് നാല് കുട്ടികളടക്കം 9 യാത്രക്കാരെ ഇയാള്‍ വിട്ടയച്ചു.

ലഹരി മരുന്നുമായി ബന്ധപ്പെട്ട കേസിനെ തുടര്‍ന്ന് 2008ല്‍ ഇയാളെ ജോലിയില്‍ നിന്നു പിരിച്ചുവിട്ടിരുന്നു.
ജോലിയില്‍ തിരിച്ചെടുക്കണമെന്ന് അവശ്യപ്പെട്ടാണ് ഇയാള്‍ ബസ് തട്ടിയെടുത്തത്.

പൊലീസ് സേനയിലെ മുതിര്‍ന്ന ഉദ്യോഗസ്ഥനായിരുന്ന റൊണാള്‍ഡോ മെന്‍ഡോസയാണ് ബസ് തട്ടിയെടുത്തതെന്ന് പൊലീസ് അധികൃതര്‍ അറിയിച്ചു. സര്‍വീസിലിരിയ്‌ക്കെ പതിനേഴ് മെഡലുകള്‍ കിട്ടിയയാളാണ് റൊണാള്‍ഡോ.

ബന്ദി പ്രശ്‌നം കൈകാര്യം ചെയ്യാന്‍ ഹോങ്കോങ് സര്‍ക്കാര്‍ തങ്ങളുടെ രണ്ട് പ്രതിനിധികളെ അടിയന്തരമായി മനിലയിലേക്കയച്ചിട്ടുണ്ട്.