ഗൂഗിളിനെതിരെ യാഹൂവും ബിങും കൈകോര്‍ക്കുന്നു

ന്യൂയോര്‍ക്ക്: സെര്‍ച്ച് എഞ്ചിന്‍ ഭീമനായ ഗൂഗിളിന്റെ മുന്നേറ്റത്തിന് തടയിടാന്‍ യാഹുവും മൈക്രോസോഫ്റ്റിന്റെ ബിംങും കൈകോര്‍ക്കുന്നു.

ഇതിന്റെ ഭാഗമായി യാഹുവിന്റെ മൊബൈല്‍, വെബ് സെര്‍ച്ചുകള്‍ ബിങിലേക്ക് മാറ്റുന്ന പ്രക്രിയ പൂര്‍ത്തിയായതായി അധികൃതര്‍ അറിയിച്ചു.

യാഹുവിന്റെയും ബിങിന്റെയും വളര്‍ച്ചയില്‍ വഴിത്തിരിവാകുന്ന നീക്കമാണിതെന്ന് മൈക്രോസോഫ്റ്റ് വക്താവ് പറഞ്ഞു. പരിവര്‍ത്തന പ്രക്രിയ വളരെ സുഗമമായാണ് നടന്നതെന്നും ഉപഭോക്താക്കള്‍ക്കും ഇത് ഏറെ ഉപകാരപ്രദമായിരിക്കുമെന്നും അദ്ദേഹം അറിയിച്ചു.

ഗൂഗിളിനെ നേരിടാന്‍ ബിങും യാഹുവും ഒരിമിച്ചു പ്രവര്‍ത്തിക്കാന്‍ ഒരു വര്‍ഷം മുമ്പ് തന്നെ തീരുമാനിച്ചിരുന്നു. ഇതിന്റെ ഭാഗമായി ഇരുവരും കരാറിലേര്‍പ്പെടുകയും ചെയ്തിരുന്നു.

യാഹൂവിന്റെ സൈറ്റുകളില്‍ മൈക്രോസോഫ്റ്റിന്റെ സെര്‍ച്ച് എന്‍ജിനായ ബിങ് ഉപയോഗിക്കാനും ഇരു കമ്പനികളുടെയും പരസ്യങ്ങളുടെ ആഗോള ചുമതല യാഹൂവിനെ ഏല്‍പ്പിക്കാനും കരാറില്‍ വ്യവസ്ഥയുണ്ടായിരുന്നു.

10 വര്‍ഷത്തെ കാലാവധിയാണ് കരാറിനുള്ളത്. അമേരിക്കയിലെ സെര്‍ച്ച് എന്‍ജിന്‍ രംഗത്ത് യാഹൂവിന്റെയും മൈക്രോസ്‌ഫോറ്റിന്റെയും സാന്നിധ്യം 26 ശതമാനമേയുള്ളു. ബാക്കി 66 ശതമാനവും ഗൂഗിളിന്റേതാണ്.