വെളിയത്തിന്റേത് ചാക്യാര്‍കൂത്തിലെ തമാശ: ഗൗരി

ആലപ്പുഴ: തന്നെ സിപിഐയിലേക്കു ക്ഷണിച്ച വെളിയം ഭാര്‍ഗവന്റെ പ്രസ്താവന തമാശയായിട്ടാണു കരുതുന്നതെന്നു കെ ആര്‍ ഗൗരിയമ്മ.

ചാക്യാര്‍കൂത്തില്‍ തമാശ പറയുന്നതു പോലെയാണ് വെളിയം സംസാരിക്കുന്നത്. എനിക്ക് സിപിഐയിലേക്ക് പോകണമായിരുന്നെങ്കില്‍ അത് ടി.വി. തോമസിന്റെ കാലത്തുതന്നെ ആകാമായിരുന്നു-ഗൗരിയമ്മ പറഞ്ഞു.

യുഡിഎഫില്‍ ഉറച്ചു നില്‍ക്കും. സിപിഐയില്‍ എടുക്കണമെന്നാവശ്യപ്പെട്ട് ഞാന്‍ അവരുടെ ഓഫിസിന്റെ വരാന്തയില്‍ അപേക്ഷയുമായി നില്‍ക്കുന്നതു പോലെയാണു വെളിയം ഭാര്‍ഗവന്റെ പ്രസ്താവന കേള്‍ക്കുമ്പോള്‍ തോന്നുന്നത്.

നിയമസഭയില്‍ ഉപനേതാവായിരുന്നപ്പോള്‍ എന്റെ പിന്നില്‍ ഇരുന്ന് കയ്യടിച്ചിരുന്നയാളാണ് വെളിയം. എന്തായാലും എന്നോടു കരുണ കാട്ടിയതില്‍ നന്ദിയുണ്ട്. എന്തായാലും പണ്ട് പുറത്താക്കിയപ്പോള്‍ ചെണ്ട കൊട്ടി പുറകേ നടന്നവര്‍ ഇപ്പോള്‍ പാര്‍ട്ടിയിലേക്കു ക്ഷണിക്കുന്നതില്‍ സന്തോഷമുണ്ട്.യുഡിഎഫില്‍ ഐക്യമുണ്ടാകണമെന്നു മാത്രമാണു പറഞ്ഞത്.

ഐക്യമുന്നണിയെന്നാല്‍ ഐക്യത്തോടെ നീങ്ങണം. സഹികെട്ടാണ് സിപിഎമ്മില്‍ നിന്ന് 1994ല്‍ പുറത്തുവന്നത്. ഞാന്‍ കെട്ടിപ്പടുത്ത പാര്‍ട്ടിയായിരുന്നു സിപിഎം- ഗൗരിയമ്മ പറഞ്ഞു.

ജെഎസ.എസിന് ഒരുലക്ഷം അംഗങ്ങളുണ്ട്. അവരെ വഞ്ചിക്കില്ല. റിബലുകളെ നിര്‍ത്തി ഘടകകക്ഷികളെ തോല്‍പ്പിക്കുന്ന പാരമ്പര്യം കോണ്‍ഗ്രസിനുണ്ട്. അരൂരിലെ തോല്‍വി സംബന്ധിച്ച് ഞാന്‍ ഉന്നയിച്ച പരാതി കോണ്‍ഗ്രസ് നേതൃത്വം ചെവിക്കൊണ്ടില്ല. ഇത്തരം നിലപാടുകള്‍ തിരുത്താന്‍ വേണ്ടിയാണ് ജെഎസ്എസ് പ്രതികരിച്ചതെന്നും ഗൗരിയമ്മ പറഞ്ഞു.