ഭര്‍തൃബന്ധുക്കള്‍ ഗര്‍ഭിണിയെ തീയിട്ടു

ദില്ലി: പൂര്‍ണ്ണഗര്‍ഭിണിയായ യുവതിയെ ഭര്‍ത്താവിന്റെ ബന്ധുക്കള്‍ തീകൊളുത്തി. കിഴക്കന്‍ ദില്ലിയിലില്‍ ബുധനാഴ്ച വൈകീട്ടാണ് സംഭവം നടന്നത്.

ഇരുപത്തിനാലുകാരിയായ അനിതയാണ് പൊള്ളലേറ്റ് ആശുപത്രിയില്‍ കഴിയുന്നത്. ആശുപത്രിയില്‍ പ്രവേശിപ്പിച്ച ഇവരെ അടിയന്തരശസ്ത്രക്രിയയ്ക്ക് വിധേയയാക്കി.

മാസം തികയാതെ പുറത്തെടുത്ത കുഞ്ഞിനെ ഇന്‍ക്യൂബേറ്ററില്‍ സൂക്ഷിച്ചിരിക്കുകയാണ്. യുവതിയുടെ ഭര്‍ത്താവ് രോഹിത് ചോപ്രയും കുടുംബാംഗങ്ങളും സംഭവത്തെത്തുടര്‍ന്ന് ഒളിവില്‍പ്പോയിരിക്കുകയാണ്.

ബുധനാഴ്ച അനിത അനാര്‍കലി ഗാര്‍ഡനില്‍ താമസിക്കുന്ന മാതാപിതാക്കളെ സന്ദര്‍ശിക്കാന്‍ പോയിരുന്നു. വൈകീട്ട് ഭര്‍ത്താവ് അനിതയെ തിരികെ കൊണ്ടുപോകാനായി എത്താമെന്ന് പറഞ്ഞിരുന്നു.

എന്നാല്‍ ഇതിനിടെ ഭര്‍തൃപിതാവ് ഫോണില്‍വിളിച്ച് അനിതയോട് വേഗം തന്നെ വീട്ടില്‍ തിരിച്ചെത്താന്‍ ആവശ്യപ്പെട്ടു. ഇതുപ്രകരാം തിരിച്ച് വീട്ടിലെത്തിയ അനിതയെ ഭര്‍തൃമാതാവും ഭര്‍തൃപിതാവും ചേര്‍ന്ന് മര്‍ദ്ദിയ്ക്കുകയും പെട്രോള്‍ ഒഴിച്ച് തീകൊളുത്തുകയുമായിരുന്നു.

യുവതി സഹായത്തിനായി സ്വന്തം വീട്ടുകാരെ വിളിച്ചു. അവര്‍ എത്തുമ്പോഴേയ്ക്കം ഭര്‍തൃവീട്ടുകാര്‍ അവിടം വിട്ടിരുന്നു. സ്ത്രീധനത്തിന്റെ പേരില്‍ ബന്ധുക്കള്‍ തന്നെ നിരന്തരം ഉപദ്രവിക്കാറുണ്ടായിരുന്നുവെന്ന് അനിത മൊഴി നല്‍കിയതായി പൊലീസ് പറഞ്ഞു. സംഭവത്തില്‍ വനിതാ സെല്ലും കേസെടുത്തിട്ടുണ്ട്.