പ്രതിയുടെ വെടിയേറ്റ് എസ്‌ഐ മരിച്ചു

മലപ്പുറം : മലപ്പുറം കാളിക്കാവിനടുത്ത് ചോക്കാട് പോലീസ് സബ് ഇന്‍സ്‌പെക്ടര്‍ വെടിയേറ്റു മരിച്ചു. കാളിക്കാവ് സ്‌റ്റേഷനിലെ ഗ്രേഡ്എസ്‌ഐ വിജയകൃഷ്ണനാണ് പ്രതിയുടെ വെടിയേറ്റ് മരിച്ചത്. സ്ത്രീധന പീഡനക്കേസിലെ പ്രതിയായ കാരങ്ങോട്ട് മുജീബാണ് വെടിവച്ചതെന്ന് പൊലിസ് പറഞ്ഞു.

സ്ത്രീപീഡനക്കേസിലെ പ്രതിയായ മുജീബിന് വാറന്റ് നല്‍കാന്‍ എത്തിയപ്പോഴാണ് സംഭവമെന്നാണ് ആദ്യവിവരം. സംഭവത്തിനുശേഷം പ്രതി ഓടിരക്ഷപ്പെട്ടു. സ്‌റ്റേഷനിലേക്ക് പലതവണ വിളിപ്പിച്ചെങ്കിലും മുജീബ് ഹാജരായിരുന്നില്ല. തുടര്‍ന്നാണ് ഇയാളെ തേടി പോലീസ് വീട്ടിലെത്തിയത്.

വീടിന് സമീപത്ത് ജീപ്പ് നിര്‍ത്തിയ ശേഷം എസ്.ഐയും സംഘവും വീടിനെ ലക്ഷ്യമാക്കി നടക്കുമ്പോള്‍ മുജീബ് കള്ളത്തോക്ക് ഉപയോഗിച്ച് വെടിവെക്കുകയായിരുന്നു.

വെടിയേറ്റ വിജയകൃഷ്ണനെ ഉടനെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. മൃതദേഹം നിലമ്പൂര്‍ താലൂക്ക് ആശുപ്രിയില്‍ സൂക്ഷിച്ചിരിക്കുകയാണ്.

മുജീബിനുവേണ്ടിയുള്ള തിരച്ചില്‍ പൊലിസ് ഊര്‍ജിതമാക്കിയിട്ടുണ്ട്. ഇയാള്‍ കാട്ടിനുള്ളില്‍ ഒളിച്ചതായാണ് പൊലിസ് കരുതുന്നത്. ഡിജിപി സംഭവസ്ഥലത്തേക്കു തിരിച്ചു.