ആദ്യം ജീസസ്, ഇപ്പോള്‍ സാത്താനും കുളിമുറിയില്‍

ബുഡാപെസ്റ്റ്: പുതിയതായി പണി കഴിപ്പിച്ച കുളിമുറിയിലെ ടൈല്‍സില്‍ സാത്താന്റെ മുഖം തെളിഞ്ഞുവന്നത് ഒരു കുടുംബത്തെ ഭീതിയിലാഴ്ത്തി. ഹംഗറി തലസ്ഥാനമായ ബുഡാപെസ്റ്റിനു സമീപത്തുള്ള ബെകസ്‌മെജ്യര്‍ എന്ന ഗ്രാമത്തിലാണ് സംഭവമുണ്ടായിരിക്കുന്നത്. ലസാലോ എന്നയാളാണ് തന്റെ കുളിമുറിയില്‍ സാത്താന്‍ കയറിക്കൂടിയെന്ന വാദവുമായി രംഗത്തെത്തിയത്.

ഇയാളുടെ കുളിമുറി ഈയിടെ ടൈല്‍സ് പതിപ്പിച്ച് മോടി കൂട്ടിയിരുന്നു. ഇതിന് ശേഷം ലസാലോയുടെ ഭാര്യ കുളിയ്ക്കാനായി കയറിയപ്പോഴാണ് സാത്താന്റെ മുഖം ശ്രദ്ധയില്‍പ്പെട്ടതത്രേ. കുളിയ്ക്കുന്നതിനിടെ ഇവര്‍ കരഞ്ഞു ബഹളം കൂട്ടി പുറത്തേക്കോടിയത്രേ. കുളിമുറിയില്‍ ടൈസില്‍ നിന്നും തന്നെ തുറിച്ചു നോക്കിയ സാത്താനില്‍ രക്ഷപ്പെടാനാണ് നഗ്നയായി പുറത്തേക്കോടിയതെന്ന് ലസാലോയുടെ ഭാര്യ ആന്ദ്രെ പറഞ്ഞു.

ടൈലുകള്‍ പതിപ്പിക്കുമ്പോള്‍ സാത്താന്റെ മുഖം ഇല്ലായിരുന്നുവെന്നും ഇതെങ്ങനെ പ്രത്യക്ഷപ്പെട്ടുവെന്ന് അറിയില്ലെന്നും ലസാലോ പറഞ്ഞു. സാത്താന്റെ മുഖം മായ്ച്ചുകളയാന്‍ പഠിച്ച പണി പതിനെട്ടും പയറ്റിയിട്ടും ലസാലോയ്ക്കും കുടുംബത്തിനും കഴിഞ്ഞില്ല. ഇനിയിപ്പോള്‍ ഏതെങ്കിലും മന്ത്രവാദികളുടെ സഹായത്തില്‍ ചെകുത്താനെ ഒഴിപ്പിയ്ക്കാനാണ് കുടുംബത്തിന്റെ തീരുമാനമെന്നും മാധ്യമങ്ങള്‍ റിപ്പോര്‍ട്ട് ചെയ്യുന്നു.

ഇതിന് മുമ്പം സമാനമായ സംഭവങ്ങള്‍ പലയിടത്തും അരങ്ങേറിയിട്ടുണ്ട്. അഞ്ച് വര്‍ഷം മുമ്പ് യുഎസിലെ പെന്‍സില്‍വാനിയയിലെ ഒരു വീട്ടിലെ കുളിമുറിയില്‍ പ്രത്യക്ഷപ്പെട്ടത് സാക്ഷാല്‍ ജീസസിന്റെ മുഖമായിരുന്നു. ഷവറില്‍ നിന്നും വെള്ളം ടൈല്‍സില്‍ തെറിച്ചു വീണായിരുന്നു റിഗോയെന്നയാളുടെ വീട്ടില്‍ ജീസസിന്റെ മുഖം പ്രത്യക്ഷപ്പെട്ടത്. പിന്നീട് റീഗോ ഈ അദ്ഭുത ഷവര്‍ 2000 ഡോളറിന് വിറ്റു. 28000 ഡോളറിന് കന്യാമറിയത്തിന്റെ രൂപം കാണപ്പെട്ട സാന്‍ഡ് വിച്ച് സ്വന്തമാക്കിയ ഗോള്‍ഡന്‍ പാലസ് എന്ന വെബ്‌സൈറ്റാണ് അദ്ഭുത ഷവറും സ്വന്തമാക്കിയതത്രേ.