മൂക്കുത്തിയിട്ടതിന് സ്‌കൂളില്‍ നിന്നും പുറത്താക്കി

റലെയ്ഗ്(നോര്‍ത്ത് കരോളിന): മൂക്കൂത്തി അണിഞ്ഞ കുറ്റത്തിനു 14കാരിയെ സ്‌കൂളില്‍ നിന്നു പുറത്താക്കി. വടക്കന്‍ കരോളിനയിലെ റലെയ്ഗില്‍ നിന്നു 15 മൈല്‍ അകലെ ക്ലെയ്റ്റണ്‍ ഹൈസ്‌കൂളിലാണ് സംഭവം നടന്നത്.

സ്‌കൂളിലെ വസ്ത്രധാരണ നിയമം(ഡ്രസ് കോഡ്) ലംഘിച്ചുവെന്നാരോപിച്ചാണ് അരീന ഇയാനോ എന്ന വിദ്യാര്‍ഥിനിയെ പുറത്താക്കിയത്. വീട്ടിലെത്തിയ ഇയാനോ അമ്മയേയും കൂട്ടി സ്‌കൂളിലെത്തി.

മകളെ തിരിച്ചെടുക്കണമെന്ന് അവര്‍ ആവശ്യപ്പെട്ടെങ്കിലും സ്‌കൂള്‍ അധികൃതര്‍ ഇതിനു തയാറായില്ല. പിന്നീട് സസ്‌പെന്‍ഷന്‍ കാലാവധി അവസാനിച്ച ശേഷം ഇയാനോ അമ്മയേയും കൂട്ടി വീണ്ടും സ്‌കൂളിലെത്തി. . അപ്പോഴും ഇയാനോ മൂക്കൂത്തി ഉപേക്ഷിക്കാന്‍ തയാറായിരുന്നില്ല.

മൂക്കൂത്തി കണ്ട സ്‌കൂള്‍ അധികൃതര്‍ ഇയാനോയെ രണ്ടാമതും സസ്‌പെന്റ് ചെയ്തു. ഇത്തവണ അഞ്ചു ദിവസമാണ് സസ്‌പെന്‍ഷന്‍ വിധിച്ചിരിക്കുന്നത്.

സെപ്റ്റംബര്‍ 21നാണ് രണ്ടാമത്തെ സസ്‌പെന്‍ഷന്‍ അവസാനിക്കുന്നത്. ഇതിനു ശേഷവും മൂക്കൂത്തിയണിഞ്ഞാണ് ഇയാനോ സ്‌കൂളില്‍ എത്തുന്നതെങ്കില്‍ കുട്ടിയെ പത്തു ദിവസത്തേയ്ക്കു സസ്‌പെന്‍ന്റു ചെയ്യുമെന്നാണ് സ്‌കൂള്‍ അധികൃതരുടെ മുന്നറിയിപ്പ്.