പ്രവാസികളുടെ നിക്ഷേപം കുറയുന്നു

തിരുവനന്തപുരം: സംസ്ഥാനത്തെ വാണിജ്യ ബാങ്കുകളില്‍ വിദേശ മലയാളികള്‍ നിക്ഷേപിയ്ക്കുന്നത് കുറയുന്നു. കഴിഞ്ഞ സാമ്പത്തിക വര്‍ഷം ഈ കുറവ് 133 കോടിയുടേതായിരുന്നു. കേരളത്തില്‍ നിന്നുള്ള ബാങ്ക് നിക്ഷേപത്തിന്റെ വളര്‍ച്ചയും കുറഞ്ഞിരിയ്ക്കുകയാണ്. സംസ്ഥാനതല ബാങ്കേഴ്സ് സമിതിയുടെ യോഗത്തിലെ അവലോകനത്തിലാണ് ഈ കണക്കുകള്‍ അവതരിപ്പിച്ചത്.

കേരളത്തിന്റെ സാമ്പത്തിക വരുമാനത്തില്‍ 25 ശതമാനം വിദേശ മലയാളികള്‍ അയയ്ക്കുന്ന പണത്തില്‍ നിന്നാണ് വരുന്നത്. ഈ സാഹചര്യത്തില്‍ കേരളത്തിലേയ്ക്കുള്ള ഈ നിക്ഷേപ കുറവ് സംസ്ഥാനത്തിന്റെ സാമ്പത്തിക നിലയേയും ബാധിച്ചുകൂടായ്കയില്ല. ആഗോള മാന്ദ്യമാണ് ഈ നിക്ഷേപ കുറവിന് കാരണമെന്നാണ് കണക്ക് കൂട്ടല്‍.

2009 മാര്‍ച്ചില്‍ സംസ്ഥാനത്തെ മൊത്തം വിദേശ മലയാളി നിക്ഷേപം 37019 കോടിയായിരുന്നു. ഇത് 2010 മാര്‍ച്ചില്‍ 36886 കോടിയായി കുറഞ്ഞു. 2008-09 സാമ്പത്തിക വര്‍ഷത്തില്‍ 7130 കോടിയുടെ വര്‍ധനയുണ്ടായ സ്ഥാനത്താണ് കഴിഞ്ഞ സാമ്പത്തികവര്‍ഷത്തില്‍ ഈ കുറവുണ്ടായത്.

മൊത്തം നിക്ഷേപത്തിന്റെ വളര്‍ച്ചയും കുറഞ്ഞിട്ടുണ്ട്. 2009-10ല്‍ 13,054 കോടി രൂപയാണ് മുന്‍ വര്‍ഷത്തേക്കാള്‍ അധികമായി നിക്ഷേപിയ്ക്കപ്പെട്ടത്. 2008-09 ല്‍ ഇത് 24,862 കോടി രൂപയായിരുന്നു. 2010 മാര്‍ച്ച് വരെ സംസ്ഥാനത്തെ മൊത്തം നിക്ഷേപം 143404 കോടി രൂപയാണ്.

പ്രതി വര്‍ഷം ഇന്ത്യയിലേയ്ക്ക് വിദേശ ഇന്ത്യാക്കാര്‍ അയയ്ക്കുന്ന പണം 2,22,735 കോടി രൂപയോളം വരും. ഇത് മാര്‍ച്ച് 2010 യിലെ കണക്കാണ്.