ഭാരതി മൊബൈല്‍ ഹാന്റ്സെറ്റ് ഇറക്കുന്നു

ദില്ലി: ഇന്ത്യയിലെ പ്രധാന മൊബൈല്‍ സേവന ദാതാവായ ഭാരതി ഹാന്റ്സെറ്റ് വിപണന രംഗത്തേയ്ക്കിറങ്ങുന്നു. ഭാരതിയുടെ ഫോണ്‍ നിര്‍മാണ കമ്പനിയായ ബീടെല്‍ ആണ് പുതിയ സംരംഭം തുടങ്ങുന്നത്. വിലകുറഞ്ഞ ഹാന്റ്സെറ്റുകള്‍ ഉല്പാദിപ്പിച്ച് വില്‍ക്കുകയാണ് കമ്പനിയുടെ ലക്ഷ്യം.

1750 രൂപയ്ക്കും 7000 രൂപയ്ക്കും ഇടയിലുള്ള എട്ട് ഹാന്റ്സെറ്റുകളാണ് ആദ്യമായി ബീടെല്‍ വിപണിയില്‍ ഇറക്കിയത്. ഈ എട്ട് ഹാന്റ് സെറ്റുകളിലും ഡ്യൂവല്‍ സിം, എഫ്എം, ക്യാമറ എന്നീ സൗകര്യങ്ങള്‍ ഉണ്ട്. ഈ വിലയ്ക്കുള്ള ഫോണുകളുടെ വിപണി വര്‍ഷം തോറും 30 ശതമാനം വര്‍ദ്ധനയാണ് കാണിയ്ക്കുന്നത്. മികച്ച സൗകര്യങ്ങളുള്ള വിലകുറഞ്ഞ ഫോണുകള്‍ വിപണിയില്‍ എത്തിയ്ക്കുകയാണ് ലക്ഷ്യമെന്ന ഭാരതി ഗ്രൂപ്പ് കമ്പനിയായ ബീടെല്‍ ടെലിടെക്ക് എക്സിക്യൂട്ടീവ് ഡയറക്ടറും സിഇഒയുമായ വിനോദ് സാഹ്നി പറഞ്ഞു.

എല്ലാ വര്‍ഷവും ഇന്ത്യയിലേയ്ക്ക് ഇറക്കുമതി ചെയ്യുന്നത് 13 കോടി മൊബൈല്‍ ഫോണുകളാണ്. ഇപ്പോള്‍ ഹാന്റ്സെറ്റ് വിപണിയിലെ വമ്പന്മാര്‍ നോകിയ, സാംസങ്, മോട്ടോറോള, സോണി എറിക്സണ്‍ എന്നീ കമ്പനികളാണ്. ഇന്ത്യന്‍ കമ്പനികളായ മൈക്രോമാക്സ്, കാര്‍ബണ്‍ എന്നിവയും മികച്ച് തുടക്കം കുറിച്ചിട്ടുണ്ട്.

ബീടെല്‍ ഇറക്കുന്ന ചില ഫോണുകളില്‍ മൂന്ന് സിം സൗകര്യം ഉണ്ടാവും. രണ്ട് ജിഎസ്എം സിമ്മും ഒരു സിഡിഎം എ സിമ്മുമായിരിയ്ക്കും ഇത്.