ടിസിഎസ് ബാംഗ്ലൂരില്‍ പുതിയ ഓഫീസ് തുടങ്ങുന്നു

ബാംഗ്ലൂര്‍: പുതിയ ഓഫീസ് തുടങ്ങാനായി ടാറ്റ കണ്‍സല്‍ട്ടന്‍സി സര്‍വീസസ് (ടിസിഎസ്) കര്‍ണാടക സര്‍ക്കാരിനോട് 100 ഏക്കര്‍ സ്ഥലം ആവശ്യപ്പെട്ടു.

ദേവനഹള്ളിയിലെ ബാംഗ്ലൂര്‍ അന്താരാഷ്ട്ര വിമാനത്താവളത്തിനടുത്ത് സ്ഥലം നല്‍കുന്നതിനെക്കുറിച്ച് ആലോചിയ്ക്കുകയാണെന്നാണ കര്‍ണാടക സര്‍ക്കാര്‍ പ്രതിനിധി ഇതിനെക്കുറിച്ച് ആരാഞ്ഞപ്പോള്‍ പ്രതികരിച്ചത്. പുതിയ വിമാനത്താവള പരിസരം ഒരു ഐടി കേന്ദ്രമായി വികസിപ്പിയ്ക്കാനായി സര്‍ക്കാര്‍ ഉദ്ദേശിയ്ക്കുന്നുണ്ട്. ഇതിന്റെ ഭാഗമായാണ് ടിസിഎസിന് ആ പ്രദേശത്ത് സ്ഥലം നല്‍കാന്‍ ഉദ്ദേശിയ്ക്കുന്നത്. മറ്റ് ചില ഐടി കമ്പനികള്‍ ദേവനഹള്ളിയില്‍ സ്ഥലം ആവശ്യപ്പെട്ടിട്ടുണ്ട്.

ഈ പ്രദേശത്ത് ഒരു ഏയ്റോസ്പേസ് മേഘല വികസിപ്പിയ്ക്കാനും സര്‍ക്കാര്‍ ആരോചിയ്ക്കുന്നുണ്ട്. ഇതിനൊപ്പം ടെക്നോളജി മേഘലയ്ക്കായി ഒരു ടൗണ്‍ഷിപ്പ് തന്നെ ദേവനഹള്ളിയില്‍ വികസിപ്പിയ്ക്കും. ഇന്‍ഫര്‍മേഷന്‍ ടെക്നോളജി ഇന്‍വസ്റ്റ്മെന്റ് റീജിയണ്‍ (ഐടിഐആര്‍) എന്നായിരിയ്ക്കും ഇതിന് പേര്. 12000 ഏക്കര്‍ വിസ്തൃതിയുള്ളതായിരിയ്ക്കും ഈ ടൗണ്‍ഷിപ്പ്. ഇതിനായി 2081 ഏക്കര്‍ ഏറ്റെടുക്കാനുള്ള നോട്ടിഫിക്കേഷന്‍ ആയിക്കഴിഞ്ഞു. ഈ പ്രദേശത്ത് പ്രവര്‍ത്തനം ആരംരഭിയ്ക്കാനായി 58 ഐടി കമ്പനികള്‍ സര്‍ക്കാരിനെ സമീപിച്ചിട്ടുണ്ട്. ഇന്‍ഫോസിസ്, വിപ്രൊ, തേജസ് നെറ്റ്വര്‍ക്ക്സ്, കൊഗ്നിസന്റ് എന്നീ കമ്പനികള്‍ ഇതില്‍ പെടും.