ഷൂസില്‍ ദൈവങ്ങളുടെ ചിത്രം; കമ്പനി മാപ്പു പറഞ്ഞു

വാഷിങ്ടണ്‍: ഹിന്ദു ദൈവങ്ങളുടെ ചിത്രം ആലേഖനം ചെയ്ത് ഷൂസ് പുറത്തിറക്കിയ അമേരിക്കന്‍ കമ്പനി പുലിവാല്‍ പിടിച്ചു.

ഇന്ത്യക്കാരുടെ ശക്തമായ പ്രതിഷേധത്തെത്തുടര്‍ന്ന് കമ്പനി ഷൂസ് വിപണിയില്‍ നിന്നും പിന്‍വലിച്ചു. ഇത്തരം ഷൂസ് പുറത്തിറക്കിയതില്‍ കമ്പനി ഹിന്ദു മതവിശ്വാസികളോട് ക്ഷമചോദിക്കുകയും ചെയ്തിട്ടുണ്ട്.

ഹൂസ്റ്റണില്‍ താമസമാക്കിയ ബേഥ് കുല്‍ക്കര്‍ണി എന്ന സ്ത്രീയാണ് ഈ വിഷയത്തില്‍ മാപ്പുപറയണമെന്നാവശ്യപ്പെട്ട് ഷൂ കമ്പനിക്ക് ഇമെയില്‍ അയച്ചത്.

മനഃപൂര്‍വമല്ലാതെ പറ്റിപ്പോയ പിഴവാണ് എന്ന് കമ്പനി പ്രതികരിച്ചു. ഇതില്‍ മാപ്പുപറയുന്നുവെന്നും ഇത്തരം ഷൂസ് വിപണിയില്‍ നിന്ന് പിന്‍വലിക്കുകയാണെന്നും കമ്പനി വക്താവ് വ്യക്തമാക്കി.

ദി കണ്‍വേഴ്‌സ് ഷൂ കമ്പനിയാണ് ജിമി ഹെന്‍ഡ്രിക്‌സ് ആക്‌സിസ് എന്ന പേരില്‍ ഡിസൈനര്‍ ഷൂസ് വിപണിയിലിറക്കിയത്. റോക്ക് താരം ജിമിഹെന്‍ ഡ്രിക്‌സിന്റെ ബഹുമാനാര്‍ത്ഥമാണ് ജിമി ഹെന്‍ഡ്രക്‌സ് ആക്‌സിസ് എന്ന് ഷൂസിന് പേരിട്ടത്.

ഹെന്‍ഡ്രിക്‌സ് 2967ല്‍ പുറത്തിറക്കിയ ആക്‌സിസ് ബോള്‍ഡ് ആസ് ലവ് എന്ന ആല്‍ബത്തിന്റെ കവര്‍ചിത്രത്തിന്റെ മാതൃകയിലാണ് ഷൂസിന് ഡിസൈന്‍ നല്‍കിയത്. ഇതാണ് കുഴപ്പമായത്. ആല്‍ബത്തിന്റെ കവര്‍ ചിത്രത്തില്‍ ഹിന്ദു ദൈവങ്ങളെയും ചിത്രീകരിച്ചിരുന്നു.