ഓര്‍ക്കുട്ട് വൈറസിനെ നീക്കി

ലണ്ടന്‍: പ്രമുഖ സോഷ്യല്‍ നെറ്റ് വര്‍ക്കിങ് സൈറ്റായ ഓര്‍ക്കുട്ടില്‍ കടന്നുകയറിയ വൈറസ് നീക്കം ചെയ്തതായി ഗൂഗിള്‍ അറിയിച്ചു.

കഴിഞ്ഞ ശനിയാഴ്ചയാണ് നല്ല ശനിയാഴ്ച എന്ന് പോര്‍ച്ചുഗീസ് ഭാഷയില്‍ അര്‍ത്ഥം വരുന്ന ബോം സബാഡോ എന്ന വാക്കും കുറച്ചു ജാവാ സ്‌ക്രിപ്റ്റും ഉള്‍പ്പെട്ട വൈറസിനെ ഹാക്കര്‍മാര്‍ ഓര്‍ക്കുട്ടിലേക്ക് കടത്തിവിട്ടത്. ചുരുങ്ങിയ സമയത്തിനുള്ളില്‍ 50 ലക്ഷത്തോളം ഓര്‍ക്കുട്ട് പ്രൊഫൈലുകള്‍ വൈറസ് ആക്രമണത്തിനിരയായിരുന്നു. ഓര്‍ക്കുട്ടിന്റെ ചരിത്രത്തിലെ ഏറ്റവും വലിയ വൈറസ് ബാധയായിരുന്നു ഇത്.

ഞായറാഴ്ച ഉച്ചയോടെയാണ് വൈറസുകളെ പൂര്‍ണമായും നീക്കം ചെയ്തത്. എന്നാല്‍ സുരക്ഷ ഉറപ്പുവരുത്തുന്നതിനായി ഉപയോക്താക്കള്‍ ബൗസറുകളിലെ കുക്കീസ് ഡീലീറ്റ് ചെയ്യണമെന്നും കഴിവതും വേഗം പാസ് വേര്‍ഡുകള്‍ മാറ്റണമെന്നും ഗൂഗിള്‍ നിര്‍ദ്ദേശിക്കുന്നു. വൈറസ് നീക്കം ചെയ്ത ശേഷം അവ ബാധിച്ച പ്രൊഫൈലുകള്‍ ഫോര്‍മാറ്റ് ചെയ്യുന്ന ജോലി തുടരുകയാണെന്നും ഗൂഗിള്‍ വാര്‍ത്താക്കുറിപ്പിലൂടെ അറിയിച്ചു.

വൈറസ് എത്തുന്ന പ്രൊഫൈലുകളില്‍ നിന്ന് സുഹൃത്തുക്കളുടെ സ്‌ക്രാപ്ബുക്കിലേക്കും വൈറസ് പോസ്റ്റ് ചെയ്യപ്പെടുകയായിരുന്നു.