ദീപാവലിയ്ക്ക് വിശിഷ്ടാതിഥിയായി ഒബാമ

വാഷിങ്‍ടണ്‍ : ദീപാവലി രാവില്‍ അമേരിക്കയുടെ പ്രസിഡന്റ് ബരാക് ഒബാമ ഇന്ത്യയിലെത്തും. കഴിഞ്ഞ തവണ വൈറ്റ്ഹൗസില്‍ ദീപാവലി ആഘോഷിച്ച ഒബാമ ഇത്തവണ ദീപാവലി ഇന്ത്യയില്‍ ആഘോഷിയ്ക്കും.

നേരത്തെ നിശ്ചയിച്ചിരുന്നതിലും രണ്ടു ദിവസം മുമ്പ് അദ്ദേഹം ഇന്ത്യയിലെത്തുമെന്ന് വൈറ്റ്ഹൗസ് വൃത്തങ്ങളാണ് അറിയിച്ചിരിക്കുന്നത്. നവംബര്‍ അഞ്ചിനു രാത്രിയില്‍ ഒബാമ ഇന്ത്യയില്‍ വിമാനമിറങ്ങും.

മുംബൈയിലായിരിക്കും ആദ്യ സന്ദര്‍ശനം. നവംബര്‍ ആറിനു മുംബൈയില്‍ നടക്കുന്ന യുഎസ്-ഇന്ത്യ വ്യവസായ ഉച്ചകോടിയില്‍ അദ്ദേഹം പങ്കെടുക്കും.

26/11 രക്തസാക്ഷികള്‍ക്ക് ആദരാഞ്ജലി അര്‍പ്പിക്കുകയാണു അദ്ദേഹത്തിന്റെ മുംബൈ യാത്രയുടെ പ്രധാന ലക്ഷ്യം. ഏഴിന് അദ്ദേഹം അമൃത്സറിലും പിന്നീട് ദില്ലിയിലും സന്ദര്‍ശനം നടത്തും.

ദില്ലിയിലെ രണ്ടാം ദിവസം അദ്ദേഹം പാര്‍ലമെന്റിന്റെ സംയുക്ത സമ്മേളനത്തെ അഭിസംബോധന ചെയ്യും.

നാല് രാഷ്ട്ര സന്ദര്‍ശനത്തിന്റെ ഭാഗമായാണ് ഒബാമ ഇന്ത്യയില്‍ എത്തുക. നവംബര്‍ നാലിന് രാത്രിയില്‍ യുഎസില്‍ നിന്ന് തിരിക്കുന്ന ഒബാമ ഇന്ത്യ സന്ദര്‍ശനത്തിനു ശേഷം ഇന്തോനേഷ്യയിലേയ്ക്കാണ് പോവുക.

ഇന്ത്യ, ഇന്തോനേഷ്യ, ജപ്പാന്‍, ദക്ഷിണ കൊറിയ തുടങ്ങിയ രാജ്യങ്ങള്‍ സന്ദര്‍ശിച്ച ശേഷം 12 ദിവസങ്ങള്‍ക്ക് ശേഷം നവംബര്‍ 14 ന് ഒബാമ തിരികെ യുഎസില്‍ എത്തും.