ഡൊകൊമൊയുടെ 3ജി ദീപാവലിയോടെ

ദില്ലി: ടാറ്റ ഡൊകൊമൊയുടെ 3ജി സേവനം ദീപാവലിയോടെ ലഭ്യമാവും, നവംബര്‍ അഞ്ചിനാണ് ദീപാവലി.

സ്വകാര്യ മൊബൈല്‍ സേവന ദാതാക്കളില്‍ 3ജി സേവനം നല്‍കുന്ന ആദ്യ സ്ഥാപനം ആയിരിയ്ക്കും ടാറ്റ ഡൊകൊമൊ. മറ്റ് സ്വകാര്യ മൊബൈല്‍ സേവന ദാതാക്കള്‍ ഒന്നും തന്നെ 3ജി സേവനം തുടങ്ങുന്ന തീയതി വെളിപ്പെടുത്തിയിട്ടില്ല.

അതിവേഗ ഇന്റര്‍നെറ്റ്, വീഡിയൊ കോണ്‍ഫറന്‍സിംഗ് തുടങ്ങിയ ഉയര്‍ന്ന ശ്രേണിയിലെ 3ജി സേവനങ്ങളായിരിയ്ക്കും ഒക്ടോബര്‍ അഞ്ചോടെ ആരംഭിയ്ക്കുകയെന്ന് കമ്പനിയുടെ മൊബിലിറ്റി ബിസിനസ് വിഭാഗം എക്സിക്യൂട്ടീവ് പ്രസിഡണ്ട് ദീപക് ഗുലാത്തി വ്യക്തമാക്കി. ഇന്ത്യയിലെ 3 ജി സേവനം മികച്ചതാക്കാന്‍ ജപ്പാന്‍ കമ്പനിയായ എന്‍ടിടി ഡൊകൊമൊ വേണ്ട നിര്‍ദ്ദേശങ്ങളും സഹായങ്ങളും നല്‍കുന്നുണ്ട്. ജപ്പാനില്‍ ഇപ്പോള്‍ ഉപയോഗത്തിലുള്ള പല 3ജി സേവനങ്ങളും വൈകാതം ഇവിടെയും നടപ്പാക്കും.

മഹാരാഷ്ട്രം, ഗുജറാത്ത്, കര്‍ണാടകം, കേരളം, ഹരിയാന, ഉത്തര്‍പ്രദേശ് (വെസ്റ്റ്), രാജസ്ഥാന്‍, മധ്യപ്രദേശ് എന്നിവിടങ്ങളിലാണ് ഡൊകൊമൊ 3ജി സേവനം ആദ്യം നടപ്പാക്കുന്നത്. 3ജി നിരക്കുകള്‍ എന്തായിരിയ്ക്കുമെന്നത് ഇതുവരെ ഡൊക്കൊമൊയും വെളിപ്പെടുത്തിയിട്ടില്ല. പക്ഷേ ഉപയോക്തൃ സൗഹൃദ നിരക്കുകളായിരിയ്ക്കുമെന്നാണ് അധികൃതര്‍ക്ക് പറയാനുള്ളത്.