കാമുകനൊപ്പം താമസിച്ച മകളെ രക്ഷിതാക്കള്‍ കൊന്നു

ജയ്പൂര്‍: അന്യജാതിയില്‍പ്പെട്ട യുവാവിനെ പ്രണയിയ്ക്കുകയും കൂടെത്താമസിയ്ക്കുകയും ചെയ്തതിനെത്തുടര്‍ന്ന് മാതാപിതാക്കള്‍ ഇരുപതികാരിയെ കൊലപ്പെടുത്തി.

രാജസ്ഥാനിലെ ചുരു ഗ്രാമവാസിയായ പ്രിയ റാത്തോഡ് ആണ് കൊല്ലപ്പെട്ടത്. സംഭവത്തെത്തുടര്‍ന്ന് പ്രിയയുടെ മാതാപിതാക്കളെ പൊലീസ് അറസ്റ്റുചെയ്തിട്ടുണ്ട്.

ജാട് വിഭാഗത്തില്‍പ്പെട്ട യുവാവിനെയായിരുന്നു പ്രിയ പ്രണയിച്ചിരുന്നത്. 2009ല്‍ മാതാപിതാക്കള്‍ പ്രിയയുടെ ബന്ധത്തെ എതിര്‍ക്കുകയും മറ്റൊരു വിവാഹത്തിന് നിര്‍ബ്ബന്ധിക്കുകയുംചെയ്തിരുന്നുവത്രേ.

ഇതിനെത്തുടര്‍ന്ന് പ്രിയ കാമുകന്‍ സൂരജ് കുമാറിനൊപ്പം ഒളിച്ചോടുകയായിരുന്നു. പിന്നീട് ഒരുമിച്ച് താമസം തുടങ്ങിയ ഇവര്‍ ഏതാനും മാസങ്ങള്‍ക്ക് മുമ്പാണ് നിയമപരമായി വിവാഹം ചെയ്തത്.

കഴിഞ്ഞദിവസമാണ് ഇക്കാര്യം പ്രിയയുടെ വീട്ടുകാര്‍ അറിഞ്ഞത്. ഇതിനെത്തുടര്‍ന്ന് വീട്ടുകാര്‍ പ്രിയയെ നിര്‍ബ്ബന്ധിച്ച് വീട്ടിലേയ്ക്ക് വരുത്തുകയായിരുന്നു. പ്രിയ വീട്ടിലെത്തിയതിന് പിന്നാലെ തിങ്കളാഴ്ച മാതാപിതാക്കള്‍ വിവാഹത്തിന്റെ കാര്യം പറഞ്ഞ് മകളോട് വഴക്കിടുകയും ബഹളമുണ്ടാക്കുയും ചെയ്തിരുന്നു.

എന്നാല്‍ തന്റെ തീരുമാനത്തില്‍ നിന്നും സൂരജുമായുള്ള ബന്ധത്തില്‍ നിന്നും പിന്‍മാറാന്‍ യുവതി തയ്യാറായില്ല. ഇതുമനസ്സിലാക്കിയ മാതാപിതാക്കള്‍ പ്രിയയെ കഴുത്തുഞെരിച്ച് കൊന്ന്് മൃതദേഹം സംസ്‌കരിക്കുകയായിരുന്നുവെന്ന് പൊലീസ് പറയുന്നു.

വീടിന്റെ പരിസരത്തുനിന്നും പൊലീസ് പ്രിയയുടെ പാതികരിഞ്ഞ മൃതദേഹം പിന്നീട് കണ്ടെടുത്തു. പ്രിയയെ തിരികെ കാണാതായപ്പോള്‍ സൂരജാണ് പൊലീസില്‍ പരാതി നല്‍കിയത്. ഇതുപ്രകാരം നടന്ന അന്വേഷണത്തിലാണ് കൊലപാതക വിവരം തെളിഞ്ഞത്.

മൃതദേഹം കണ്ടെടുത്തതിന് പിന്നാലെ പ്രിയയുടെ അച്ഛനമ്മമാരെ പൊലീസ് അറസ്റ്റുചെയ്തു. ഇവരെ ബുധനാഴ്ച കോടതിയില്‍ ഹാജരാക്കും.