വിദഗ്ധ സമിതി ഡിസം.17ന് മുല്ലപ്പെരിയാറില്‍

ദില്ലി: മുല്ലപ്പെരിയാര്‍ ഉന്നതാധികാര സമിതി ഡിസംബര്‍ 17ന് അണക്കെട്ട് സന്ദര്‍ശിക്കും. മൂന്ന് ദിവസത്തേയ്ക്കാണ് സന്ദര്‍ശനം. ഇതിനിടെ പൊതുജനങ്ങളുമായി സമിതി അംഗങ്ങള്‍ ആശയവിനിമയം നടത്തില്ല. സമിതിയുടെ വെള്ളിയാഴ്ച ചേര്‍ന്ന യോഗമാണ് ഇക്കാര്യം തീരുമാനിച്ചത്.

കഴിഞ്ഞ മാസം കേരളം മുല്ലപ്പെരിയാര്‍ അണക്കെട്ടിന്റെ ബലക്ഷയം വ്യക്തമാക്കുന്ന പുതിയ റിപ്പോര്‍ട്ടുകളും സാക്ഷിപ്പട്ടികയും ഉന്നതാധികാര സമിതിയ്ക്ക് സമര്‍പ്പിച്ചിരുന്നു.

പ്രശ്‌ന പരിഹാരത്തിന് മികച്ച മാര്‍ഗം പുതിയ ഡാം ആണെന്നും കേരളം ബോധിപ്പിച്ചിരുന്നു. എന്നാല്‍ കേസില്‍ തെളിവ് സമര്‍പ്പിക്കാനുള്ള കാലാവധി കഴിഞ്ഞുവെന്നും പുതിയ റിപ്പോര്‍ട്ടുകളും സാക്ഷി വിസ്താരവും അനുവദിക്കരുതെന്നും തമിഴ്‌നാട് അധികൃതര്‍ ആവശ്യപ്പെട്ടിരുന്നു