വെള്ളമെടുത്തതിന് ദളിതര്‍ക്ക് 45,000 രൂപ പിഴ

ബിക്കാനീര്‍: പൊതു ടാപ്പില്‍ നിന്നും കുടിവെള്ളമെടുത്തതിന് രാജസ്ഥാനിലെ ബിക്കാനീറില്‍ ദളിതര്‍ക്ക് പിഴ. ബിക്കാനീറിനടുത്തുള്ള രന്തിസാര്‍ ഗ്രാമപഞ്ചായത്താണ് മൂന്ന് ദളിതരോട് 45000 രൂപ പിഴയടക്കാന്‍ നിര്‍ദ്ദേശിച്ചിരിയ്ക്കുന്നത്. സംഭവം വിവാദമായതിനെ തുടര്‍ന്ന് പൊലീസ് കേസ് രജിസ്റ്റര്‍ ചെയ്ത് അന്വേഷണം തുടങ്ങി.

സവര്‍ണരില്‍ നിന്ന് മാത്രമല്ല, ഗ്രാമത്തിലെ മുസ്ലീം വിഭാഗത്തില്‍ നിന്നും ദളിതര്‍ ഇവിടെ അയിത്തം നേരിടുന്നുണ്ട്. പഞ്ചായത്തിന്റെ തലവനായ ഗോപെ ഖാനാണ് മൂന്ന് ദളിതരോട് പിഴയടക്കാന്‍ ആവശ്യപ്പെട്ടത്. വെള്ളമെടുത്തതിന് ഓരോരുത്തരും 15000രൂപ വീതം പിഴയടക്കാന്‍ ഖാന്‍ ഉത്തരവിടുകയായിരുന്നു.

ഈ അനീതിയ്‌ക്കെതിരെ ദളിതര്‍ പ്രതികരിച്ചപ്പോള്‍ അവരെ മര്‍ദ്ദിച്ചൊതുക്കാനും ഗോപെ ഖാന്റെ അനുയായികള്‍ ശ്രമിച്ചു. അക്രമികള്‍ക്കെതിരെ പൊലീസ് എഫ്‌ഐആര്‍ രജിസ്റ്റര്‍ ചെയ്തിട്ടുണ്ട്. അതേ സമയം ദളിതരോടുള്ള നിലപാടില്‍ മാറ്റം വരുത്തേണ്ടെന്ന് തന്നെയാണ് പഞ്ചായത്തിന്റെ തീരുമാനമെന്ന് റിപ്പോര്‍ട്ടുകളുണ്ട്.