മാര്‍ട്ടിനെതിരെ കേസെടുക്കാമെന്ന് നിയമോപദേശം

തിരുവനന്തപുരം: ലോട്ടറിപ്രശ്‌നത്തില്‍ സാന്‍റിയാഗോ മാര്‍ട്ടിനെതിരെ നിയമനടപടികള്‍ സ്വീകരിക്കുന്നതിന് തടസ്സമില്ലെന്ന് മുഖ്യമന്ത്രി വി.എസ്. അച്യുതാനന്ദന് നിയമവകുപ്പുപദേശം നല്‍കി. നവംബര്‍ ഏഴ് ഞായറാഴ്ചയാണ് നിയമവകുപ്പ് സെക്രട്ടറി കെ. ശശിധരന്‍ നായര്‍ മുഖ്യമന്ത്രിക്ക് റിപ്പോര്‍ട്ട്‌നല്‍കിയത്.

ലോട്ടറി അഴിമതി സംബന്ധിച്ച കേസിലെ അന്വേഷണം ഊര്‍ജിതമാക്കുന്നതിനായി സര്‍ക്കാര്‍ ഡി.ജി.പി സിബി മാത്യൂസിന്റെ അധ്യക്ഷതയില്‍ നിരീക്ഷണ സംഘം രൂപീകരിച്ചിരുന്നു.

കേന്ദ്ര ലോട്ടറിനിയമത്തിലെ നാലാം വകുപ്പിന്റെ ലംഘനം മേഘാ ഡിസ്ട്രിബ്യൂട്ടേഴ്‌സ് നടത്തിയിട്ടുണ്ടെന്ന് കേസുകള്‍ പരിശോധിച്ചപ്പോള്‍ തെളിഞ്ഞതായി നിയമസെക്രട്ടറിയുടെ റിപ്പോര്‍ട്ടില്‍ വ്യക്തമാക്കിയിട്ടുണ്ട്.

റിസര്‍വ് ബാങ്കിന്റെയോ ഇന്ത്യന്‍ ബാങ്കേഴ്‌സ് കൗണ്‍സിലിന്റെയോ അംഗീകാരമുള്ള പ്രസ്സുകളില്‍ മാത്രമേ ലോട്ടറി ടിക്കറ്റുകള്‍ അച്ചടിക്കാന്‍ പാടുള്ളൂവെന്ന് നാലാം വകുപ്പ് നിര്‍ദേശിക്കുന്നുണ്ട്. വാളയാര്‍ ചെക്ക്‌പോസ്റ്റില്‍ പിടിച്ചെടുത്ത ടിക്കറ്റുകള്‍ ശിവകാശിയിലെ മഹാലക്ഷ്മി എന്ന പ്രസ്സിലാണ് അച്ചടിച്ചിട്ടുള്ളതെന്ന് അന്വേഷണത്തില്‍ തെളിഞ്ഞിട്ടുണ്ട്.

സാന്‍റിയാഗോ മാര്‍ട്ടിന്റെ ഉടമസ്ഥതയിലുള്ള മഹാലക്ഷ്മി പ്രസ്സിന് റിസര്‍വ് ബാങ്കിന്റെയോ ബാങ്കേഴ്‌സ് കൗണ്‍സിലിന്റെയോ അംഗീകാരമില്ല. ഇതുള്‍പ്പെടെയുള്ള സംഗതികളുടെ വെളിച്ചത്തില്‍, 1998-ലെ കേന്ദ്ര ലോട്ടറിനിയമത്തിലെ നാലാം വകുപ്പിന്റെയും 2010-ലെ ലോട്ടറിച്ചട്ടത്തിന്റെയും ലംഘനം നടന്നിട്ടുള്ളതായി തെളിഞ്ഞിട്ടുണ്ട്.

ഈ സാഹചര്യത്തില്‍ സാന്‍റിയാഗോ മാര്‍ട്ടിന്‍, ജോണ്‍ കെന്നഡി എന്നിവര്‍ക്കെതിരെ നിയമനടപടികള്‍ സ്വീകരിക്കാന്‍ സംസ്ഥാന സര്‍ക്കാരിന് മുന്നില്‍ തടസ്സങ്ങളൊന്നുമില്ലെന്ന് നിയമോപദേശത്തില്‍ വ്യക്തമാക്കിയിട്ടുള്ളതായി അറിയുന്നു.