അഞ്ച് കോര്പ്പറേഷനുകളിലും മേയര്മാര് അധികാരമേറ്റു
തിരുവനന്തപുരം: കേരളത്തിലെ അഞ്ച് കോര്പ്പറേഷനുകളിലെയും പുതിയ മേയര്മാര് അധികാരമേറ്റു തിരുവനന്തപുരത്ത് എല്.ഡി.എഫിലെ അഡ്വ. കെ. ചന്ദ്രികയും കൊല്ലത്ത് എല് .ഡി. എഫിലെ പ്രസന്ന ഏണസ്റ്റും കൊച്ചിയില് യു.ഡി.എഫിലെ ടോണി ചമ്മണിയും തൃശൂരില് യു.ഡി.എഫിലെ ഐ.പി. പോളും കോഴിക്കോട്ട് എല് .ഡി.എഫിലെ പ്രൊഫ. എ.കെ. പ്രേമജവുമാണ് മേയര്മാരായി സ്ഥാനമേറ്റത്.
നൂറ് അംഗങ്ങളുള്ള തിരുവനന്തപുരം കോര്പ്പറേഷനില് 51 പേരുടെ പിന്തുണയുമായാണ് സി.പി.എമ്മിലെ അഡ്വ. ചന്ദ്രിക മേയറായി തിരഞ്ഞെടുക്കപ്പെട്ടത്. യു.ഡി.എഫ്. സ്ഥാനാര്ഥി ലീലാമ്മ ഐസക്കിന് നാല്പ്പതും ബി.ജെ.പി. സ്ഥാനാര്ഥി ശ്രീജ മധുവിന് ആറും വോട്ട് ലഭിച്ചു. രണ്ട് വോട്ട് അസാധുവായി. ആകെ 99 പേരാണ് സമ്മതിദാനാവകാശം വിനിയോഗിച്ചത്. തിരുവനന്തപുരത്തെ മുട്ടട വാര്ഡില് നിന്നാണ് ചന്ദ്രിക കൗണ്സിലറായി തിരഞ്ഞെടുക്കപ്പെട്ടത്.
കൊല്ലത്ത് 35 പേരുടെ പിന്തുണയുമായാണ് സി.പി.എമ്മിലെ പ്രസന്ന ഏണസ്റ്റ് മേയറായി തിരഞ്ഞെടുക്കപ്പെട്ടത്. താമരക്കുളം വാര്ഡില് നിന്നാണ് ഇവര് കൗണ്സിലിലേക്ക് തിരഞ്ഞെടുക്കപ്പെട്ടത്.
കൊച്ചി കോര്പ്പറേഷനില് 48 പേരുടെ പിന്തുണയുമായാണ് കോണ്ഗ്രസിലെ ടോണി ചമ്മണി തിരഞ്ഞെടുക്കപ്പെട്ടത്. എല് . ഡി.എഫ്. സ്ഥാനാര്ഥിയായി മത്സരിച്ച സി.പി.എമ്മിലെ കെ.ജി. ജേക്കബിന് 24 വോട്ട് ലഭിച്ചു. രണ്ട് സ്വതന്ത്രര് ടോണിയെ പിന്തുണച്ചു. കതൃക്കടവ് വാര്ഡില് നിന്നാണ് ടോണി കൗണ്സിലറായി തിരഞ്ഞെടുക്കപ്പെട്ടത്. രണ്ട് ബി.ജെ.പി. അംഗങ്ങള് വോട്ടെടുപ്പില് പങ്കെടുത്തില്ല.
യു.ഡി.എഫിന് വന് ഭൂരിപക്ഷമുള്ള തശ്ശൂര് കോര്പ്പറേഷനില് കോണ്ഗ്രസിലെ ഐ.പി. പോള് മേയറായി തിരഞ്ഞെടുക്കപ്പെട്ടു. രണ്ട് കോണ്ഗ്രസ് വിമതരുടേതടക്കം 47 വോട്ടാണ് പോളിന് ലഭിച്ചത്. എല് .ഡി.എഫ് സ്ഥാനാര്ഥിയായി മത്സരിച്ച സി.പി.എമ്മിലെ പി.എ. പുരുഷോത്തമന് ആറ് വോട്ടാണ് ലഭിച്ചത്. ബി.ജെ.പി. അംഗം വോട്ട് അസാധുവാക്കി.
ഇരുവിഭാഗവും തമ്മിലുള്ള തര്ക്കത്തിനിടെ നടന്ന വോട്ടെടുപ്പില് 38 വോട്ട് ലഭിച്ചാണ് പ്രൊഫ. എ.കെ. പ്രേമജം കോഴിക്കോട് മേയറായി തിരഞ്ഞെടുക്കപ്പെട്ടത്. യു.ഡി. എഫ്. സ്ഥാനാര്ഥിയായി മത്സരിച്ച മുന്മന്ത്രി എം.ടി.പത്മയ്ക്ക് 32 വോട്ട് ലഭിച്ചു. പ്രൊഫ. എ.കെ. പ്രേമജം ഇത് രണ്ടാം തവണയാണ് കോഴിക്കോട് കോര്പ്പറേഷന് മേയറാകുന്നത്.