നേതൃമാറ്റത്തെക്കുറിച്ച് അറിയില്ല: വെളിയം

തിരുവനന്തപുരം: സി പി ഐ സംസ്ഥാന ഘടകത്തിന് പുതിയ നേതൃത്വം വരാന്‍ പോകുന്നതിനെക്കുറിച്ച് തനിക്കൊന്നും അറിയില്ലെന്ന് പാര്‍ട്ടി സംസ്ഥാന സെക്രട്ടറി വെളിയം ഭാര്‍ഗവന്‍.

തിരുവനന്തപുരത്ത് സി പി ഐ യോഗത്തില്‍ പങ്കെടുക്കാന്‍ എത്തിയപ്പോഴാണ് വെളിയം മാധ്യമപ്രവര്‍ത്തകരോട് സംസാരിച്ചത്.

അനാരോഗ്യത്താല്‍ വെളിയം സെക്രട്ടറി സ്ഥാനം ഒഴിയുന്നതായി വാര്‍ത്തകള്‍ വന്നിരുന്നു. സി പി ഐയുടെ നേതൃയോഗങ്ങള്‍ വെള്ളിയാഴ്ച തുടങ്ങുകയും ഇതില്‍ പങ്കെടുക്കാനായി കേന്ദ്രനേതാക്കള്‍ എത്തുകയും ചെയ്യുന്നുണ്ട്.

ഈ സാഹചര്യത്തിലായിരുന്നു മാധ്യമപ്രവര്‍ത്തകര്‍ വെളിയത്തോട് ഇതിനെക്കുറിച്ച് ആരാഞ്ഞത്. എന്നാല്‍ ഇക്കാര്യം സംബന്ധിച്ച് താന്‍ ഇതുവരെ ഒന്നും അറിഞ്ഞില്ല എന്നായിരുന്നു വെളിയത്തിന്റെ മറുപടി.

സെക്രട്ടറി സ്ഥാനത്തുനിന്ന് മാറുമെന്ന് താന്‍ ഇതുവരെ പറഞ്ഞിട്ടില്ലെന്നും വെളിയം പറഞ്ഞു.

ഇതിനിടെ സി പി ഐ സംസ്ഥാന നേതൃത്വത്തില്‍ മാറ്റമുണ്ടാകുമെന്ന റിപ്പോര്‍ട്ടുകള്‍ അടിസ്ഥാനരഹിതമാണെന്ന് പാര്‍ട്ടി ജനറല്‍ സെക്രട്ടറി എ ബി ബര്‍ദനും പറഞ്ഞു.

സംസ്ഥാനത്ത് നേതൃമാറ്റം ഉണ്ടാവുമെന്ന് താന്‍ പറഞ്ഞതായ വാര്‍ത്തകള്‍ മാധ്യമങ്ങളില്‍ കണ്ട് അത്ഭുതപ്പെട്ടുവെന്നും ബര്‍ദന്‍ മാധ്യമപ്രവര്‍ത്തകരോട് പറഞ്ഞിരുന്നു.

English summary

CPI general secretary AB Bardhan today denied the news reports on the change in vague CPI state leadership in Kerala by terming it as baseless.