കലൈ്ഞ്ജറുടെ സ്വത്തിനെപ്പറ്റി രജനി

മധുര: മക്കളായ അഴഗിരിയും സ്റ്റാലിനുമാണ് തമിഴ്‌നാട് മുഖ്യന്‍ കരുണാനിധിയുടെ ഏറ്റവും വലിയ സ്വത്തെന്ന് നടന്‍ രജനികാന്ത്. അതിനാല്‍ പരസ്പരം സംരക്ഷിക്കാന്‍ ഇരുവര്‍ക്കും ബാധ്യതയുണ്ടെന്നും രജനി ഉപദേശിച്ചു.

കരുണാനിധിയുടെ ചെറുമകനും അഴഗിരിയുടെ മകനുമായ ദയാനിധി അഴഗിരിയുടെ വിവാഹത്തില്‍ പങ്കെടുക്കപ്പോഴാണ് യന്തിരന്‍ താരത്തിന്റെ ഈ പഞ്ച്ഡയലോഗ്. രജനീകാന്തിന് സ്റ്റാലിനോടാണ് അടുപ്പമെന്ന് റിപ്പോര്‍ട്ടുള്ളപ്പോഴാണ് ഈ പ്രസ്താവന.

ചെറുമക്കളുടെ വിവാഹം എത്രമാത്രം സന്തോഷകരമാണെന്ന് കരുണാനിധിയുടെ മുഖം കണ്ടാല്‍ അറിയാം. അദ്ദേഹം അതീവസന്തുഷ്ടനാണ്. ഈ സന്തോഷത്തില്‍ പങ്കെടുക്കാന്‍ സാധിച്ചത് ഭാഗ്യമായി കരുതുന്നു രജനി പറഞ്ഞു.മധുരാ നഗരത്തെ ഇളക്കിമറിച്ച വിവാഹച്ചടങ്ങില്‍ ലക്ഷക്കണക്കിന് പേരാണ് പങ്കെടുത്തത്.